زرنج (پژواک، ۲۰ زمری ۱۴۰۴): نیمروز کې سیمهییزې سرچینې وايي چې د دغه ولایت په دلارام ولسوالۍ کې د څه باندې لس میلیون افغانیو په ارزښت د اوبو رسولو د دوو شبکو جوړولو چارې پیل شوې چې په بشپړېدو سره به یې سلګونه کورنۍ پاکو اوبو ته لاسرسی ومومي.
د نیمروز د کلیو بیارغونې او پراختیا رییس ملا محمدحق بشیر پژواک خبري اژانس ته وویل چې د دغه ولایت د دلارام ولسوالۍ په ۱ او ۲ حسیناباد کلیو کې د پاکو اوبو رسولو د دوو شبکو جوړولو چارې نن (دوشنبه) پیل شوې چې په راتلونکو څلورو میاشتو کې به بشپړې شي.
هغه زیاته کړه چې دغه شبکې د ۱۰ میلیون او ۱۷۰ زره افغانیو په لګښت د اغاخان خیریه بنسټ په مالي مرسته د ډاکار موسسې له لوري د کلیو د بیارغونې او پراختیا ریاست سره په همغږۍ جوړیږي.
هغه وویل چې د یادو شبکو په جوړېدو سره به ۴۰۳ کورنۍ د څښاک پاکو اوبو ته لاسرسی پیدا کړي.
د یادونې ده چې ځايي اوسېدونکو د دغو شبکو جوړولو د کار له پیلېدو د خوښۍ څرګندولو ترڅنګ ژمنه وکړه چې د دغه ډول تاسیساتو ساتلو ته به پاملرنه کوي.
GET IN TOUCH
NEWSLETTER
SUGGEST A STORY
PAJHWOK MOBILE APP