د اوربند پر دوام د افغانستان او پاکستان هوکړه؛ راتلونکي مذاکرات د نومبر په شپږمه کېږي

کابل (پژواک، ۹ لړم ۱۴۰۴): د ترکیې د بهرنیو چارو وزارت اعلان کړی چې افغانستان او پاکستان د اوربند پر دوام هوکړه کړې او د دې هوکړې د تطبیق پر جزئیاتو به د روان کال د نومبر په شپږمه په استانبول کې د  لوړې کچې یوه غونډه کې خبرې وشي.

د ترکیې د بهرنیو چارو وزارت په یوه ګډه اعلامیه کې ویلي چې د افغانستان، پاکستان، ترکیې او قطر استازو د روان ۲۰۲۵ کال د اکتوبر له ۲۵مې تر ۳۰مې په استانبول کې سره ولیدل څو د ترکیې او قطر په منځګړیتوب د روانې میاشتې په پیل کې په دوحه کې د اوربند هوکړه پیاوړې کړي.

په اعلامیه زیاته شوې: «ټولو خواوو د اوربند پر دوام هوکړه وکړه او د دې هوکړې پر جزئیاتو او د هغې د پلي کېدو پر څرنګوالي به د نومبر په شپږمه په استانبول کې د لوړې کچې په غونډه کې بحث وشي.»

د سرچینې په وینا، دواړو خواوو دغه راز هوکړه کړې چې د څارنې او څېړنې یو ګډ مېکانیزم جوړ کړي څو سولې له ساتلو ډاډ ترلاسه شي او د هوکړې د نقض په صورت کې سرغړونکي لوري ته جرام په پام کې ونیول شي.

د یادولو ده چې شاوخوا درې اونۍ مخې (د روان کال د تلې په ۱۷مه)، د پاکستان پوځي رژیم د پکتیکا ولایت د برمل ولسوالۍ د مرغی بازار بمبار وکړ او د کابل هوايي حریم یې هم نقض کړ.

د دغو بریدونو په غبرګون کې، د اسلامي امارت ځواکونو د ډیورنډ فرضي کرښې په اوږدو کې د پاکستاني ځواکونو پر پوستو غچ اخیستونکي بریدونه وکړل او له هغه وروسته پاکستان له افغانستان سره ټولې لارې وتړلې چې تر اوسه نه دي پرانیستل شوې.