د موی‌تای افغان لوبغاړي قهرمان شاهین خپل ایراني سیال ته ماته ورکړه

کابل (پژواک، ۱۸ لړم ۱۴۰۴): د موی‌تای افغان لوبغاړي قهرمان شاهین خپل ایراني سیال پوریا ولي ته ماته ورکړه.

یاده لوبه تېره شپه د ټایلنډ په بنکاک ښار کې د موی‌تای په یوه سازمان کې ترسره شوه.

د موی‌تای افغان لوبغاړي قهرمان شاهین پر خپله فېسبوک‌پاڼه یوه ویډیو خپره کړې چې په‌کې خپل ایراني سیال پوریا ولي ته ماته ورکوي.

د شاهین او ایراني سیال ترمنځ سیالۍ په درېیو رونډونو کې ترسره شوه چې شاهین وکولای شول د نومرو په توپیر هغه ته ماته ورکړي.

د راپورونو له مخې، قهرمان شاهین تر دې مهاله د موی‌تای په بېلابېلو سازمانونو کې ۱۳ لوبې ترسره کړې چې ۱۲ یې ګټلې او یوازې یوه لوبه یې بایللې ده.