خوست ښار کې د یوه سړک جوړولو چارې پیل شوې

خوست‌ښار (پژواک، ۲۵ لېندۍ ۱۴۰۴): په خوست ښار کې د نږدې ۳۰ ميليون افغانيو په لګښت د یوه سړک جوړولو چارې پیل شوې چې د راتلونکو پنځو میاشتو په موده کې به بشپړې شي.

په دې پروژه کې چې د ښار په دويمه او درېيمه ناحیه کې پلي کيږي د ۱.۳ کيلومتره سړک، ۲.۵ کيلومتره ویالو او دوو پلچکونو جوړول شامل دي.

د خوست ښاروال حافظ عبدالرشید عمري د يادې پروژې د پيل په مراسمو کې  وويل، د دې پروژې پلي کېدو سره به، چې چارې به یې په راتلونکو پنځو مياشتو کې بشپړې شي، په ښار کې د ترافيکي ګڼې ګوڼې او بې‌نظمۍ مخه ونیول شي.

نوموړي په خپلو خبرو کې وويل، دوی په دې هڅه کې دي څو د هټيوالو او ښاريانو د ستونزو د هواري لپاره ګڼې بېلابېلې پروژې پلي کړي.

دی وايي: «موږ په خوست ښار د پروژو د پلي کولو لپاره خپلې هلې ځلې کوو او دا مو مسووليت هم دی. د ښاري نظم لپاره نور ډېر پلانونه لرو پر هغو هم کار روان دی.»

په همدې حال کې، د خوست ښار يو شمېر هټيوال او ښاريان هم د يادې رغنيزې پروژې پر پيلېدو خوښي څرګندوي او وايي چې دا پروژه به د ښاري نظم رامنځته کېدو او د ښار پاکوالي برخو کې مهم رول ولري.

د خوست ښار يو هټۍوال عبدالله منګل پژواک ته وويل: «دلته په دې ساحه کې ګردونه او خټې وي، موږ د خاورو له وجې کله کله د دوکان دروازه بنده کړو، اوس چې دا سړک جوړ شي دا ستونزې به ورسره حل شي.»

د خوست ښار يو بل اوسېدونکي شاهدالله افغان په دې اړه پژواک ته وويل: «د خوست ښار سړکونو ته بايد ډېره توجه وشي، ځکه خوست داسې ولايت دی چې د ۳۴ ولايتونو خلک دلته موجود دي، د ښار کوڅې ډېرې خرابې وې نو موږ ډېر خوښ شو چې دا پروژه پيل شوه.»

د خوست ښاروالي د مسوولينو د معلوماتو له مخې، د روان ۱۴۰۴ کال تر پايه ښايي د ۲۵۰ ميليونه افغانيو په لګښت ۳۰ رغنيزې پروژې پلې شي او راتلونکي کال ته ۴۰ لويې او وړې پروژې په نظر کې نيول شوې دي.