جلالاباد (پژواک، ۲۵ مرغومی ۱۴۰۴): د ننګرهار امنیه قومانداني وایي چې د دغه ولایت په سرهرود ولسوالۍ کې د ځمکې د ملکیت پر سر شخړه کې یوه کس ژوند له لاسه ورکړی او دوه نور ټپیان شوي دي.
د ننګرهار د امنیې قوماندانۍ خبرپاڼه کې راغلي چې دغه پېښه د سرهرود ولسوالۍ اړوند په قلعهشاهي سیمه کې د دوو کورنیو ترمنځ د ځمکې د ملکیت پر سر شوې ده.
سرچینه زیاتوي چې په دې پېښه کې د یوه لوري ۲۲ کلن ځوان ژوند له لاسه ورکړی او د بل لوري دوه کسان ټپیان شوي دي.
امنیې قوماندانۍ له خلکو غوښتي چې د هر ډول اختلافاتو د حل لپاره له قانوني لارو استفاده وکړي او خپلسري کړنې دې نه کوي.
