د افغان ـ تاجک نفتي حوزې اړوند درې بلاکونو «سایزمیکي» سروې پیل شوه

کابل (پژواک، ۶ کب ۱۴۰۴): د کانونو او پټرولیم وزارت وایي، د «ازبک اوزګېوسیز» جیولوجیکي کمپنۍ سره د هوکړه‌لیک پر بنسټ د افغان ـ تاجک حوزې اړوند د محمدجان ډګر، احمداباد او شمر بلاکونو د دوه‌بعدي سایزمیکي سروې چارې پیل شوې.

د یاد وزارت ویاند، همایون افغان تېره ورځ د بلخ ولایت په مرکز مزارشریف ښار کې جوړې شوې غونډې ته وویل چې د دوست او ګاونډي هېواد ازبکستان له لوري د افغان ـ تاجک حوزې د دغو درې بلاکونو وړیا دوه‌بعدي سایزمیکي سروې د دواړو هېوادونو ترمنځ د پیاوړو اړیکو، د ازبکستان د حسن نیت، ښه ګاونډیتوب او د کانونو او پټرولیم وزارت د ښه او اغېزمن مدیریت ښکارندویي کوي.

هغه زیاته کړه: «افغانستان پراخې او بډایې کاني زېرمې لري او موږ د دغې سترې الهي ډالۍ د اغېزمن مدیریت لپاره کلک هوډ، ښه پلانونه او عملي ګامونه لرو، څو دا شتمني د هېواد د تلپاتې پرمختګ لامل شي.»

د کانونو او پټرولیم وزارت د هایدروکاربونو د سروې رئیس عبدالخلیل حنفي هم ویلي چې افغان ـ تاجک حوزه د هېواد په شمال کې د نفتو یوه ستره تثبیت شوې حوزه ده.

د هغه په وینا، د یادې کمپنۍ له لوري به د دغې حوزې له ټولو ۱۱ بلاکونو څخه یوازې د محمدجان ډګر، احمداباد او شمر بلاکونو چې ټولیز مساحت یې ۷۶۱۷ کیلومتره مربع ته رسېږي، دوه‌بعدي سایزمیکي سروې ترسره شي.

د کانونو او پټرولیم وزارت په خبرپاڼه کې راغلي چې د یادې کمپنۍ رئیس خیت‌بای امانوف ویلي، چمتو دي له افغانانو سره ګډ کار وکړي او په دې برخه کې به د ښه ګاونډیتوب ترڅنګ خپلو هر اړخیزو همکاریو ته دوام ورکړي.