کابل (پژواک، ۸ کب ۱۴۰۴): د افغانستان لپاره د ملګرو ملتونو ځانګړي راپور ورکوونکي د افغانستان او پاکستان ترمنځ د تاوتریخوالي د سملاسي کمېدو غوښتنه کړې ده.
د افغانستان لپاره د ملګرو ملتونو ځانګړي راپور ورکوونکي ریچارډ بینېت نن (جمعه) پر خپله اېکسپاڼه یوه پیغام کې د ملکي وګړو پر خوندیتوب د ټینګار ترڅنګ ویلي چې باید د بشري حقونو او نړۍوالو بشري قوانینو درناوی وشي.
هغه زیاته کړې ده: «یو ځل بیا د ارامۍ او د بشري حقونو او نړۍوالو بشري قوانینو، په ځانګړي ډول د ملکي وګړو د خوندیتوب د رعایت غوښتنه کوم، هغه روان مخالفتونه چې د افغانستان او پاکستان ترمنځ رامنځته شوی، له بده مرغه په تاوتریخوالي اوښتی دی. د تاوتریخوالي سملاسي کمېدل بېخي اړین دي.»
دا په داسې حال کې ده چې د پاکستان پوځي رژیم د تېرې اونۍ د یکشنبې په شپه پکتیکا کې پر یوې مدرسه او د ننګرهار په بهسود ولسوالۍ کې پر یوه کور هوايي بریدونه وکړل چې په پایله کې یې په بهسودو کې د یوې کورنۍ ۱۷ غړي چې ښځې او ماشومان هم پکې شامل وو، شهیدان او یو شمېر نور ټپیان شول.
د دغو بریدونو په غبرګون کې د اسلامي امارت ځواکونو تېره شپه په پکتیکا، پکتیا، خوست، ننګرهار، کونړ او نورستان ولایتونو کې د ډیورنډ کرښې هغې غاړې ته د پاکستان پر امنیتي پوستو غچاخیستونکي بریدونه وکړل.
د ملي دفاع وزارت د معلوماتو له مخې، افغان ځواکونو په دغو عملیاتو کې ۵۵ پاکستاني سرتېري وژلي، دوه قرارګاوې او ۱۹ پوستې یې نیولې او له څلورو نورو پوستو پاکستاني ځواکونه تښتېدلي دي.
د دفاع وزارت په یوه خبرپاڼه کې لیکلي: «په دې عملیاتو کې زموږ ۸ مجاهدین د شهادت لوړ مقام ته رسېدلي او ۱۱ تنه نور ټپیان شوي دي. همدارنګه په ننګرهار کې د کډوالو پر کمپ د دښمن د راکټي برید له امله ۱۳ کسان ملکي هېوادوال هم ټپیان شوي چې یو شمېر یې ښځې او ماشومان دي.
یاد بریدونه تېره شپه ناوخته پای ته ورسېدل.
د اسلامي امارت ویاند ذبیحالله مجاهد تېره شپه وویل: «بزدلو پاکستاني ځواکونو په کابل، کندهار او پکتیا ولایتونو کې پر ځینو سیمو بمبار وکړ خو الحمدالله ځاني تلفات نه لري.»
GET IN TOUCH
NEWSLETTER
SUGGEST A STORY
PAJHWOK MOBILE APP