کابل (پژواک، ۱۴ چنګاښ ۱۴۰۵): د شپږیزه کرکټ لیګ یوولسم پړاو سیالیو په لړ کې د بست ساتونکو لوبډلې بند امیر ښامارانو لوبډلې ته د درېیو وېکټو په توپیر ماته ورکړه.
د یوولسم پړاو ايانډ شپږیزه کرکټ لیګ سیالیو کې نن له غرمې مخکې د بست ساتونکو او د بند امیر ښامارانو لوبډلو ترمنځ لوبه ترسره شوه.
د لوبې پچه د بست ساتونکو لوبډلې وګټله او لومړۍ یې د بند امیر ښامارانو لوبډلې پر وړاندې د توپاچونې پرېکړه وکړه.
په لوبه کې د بند امیرښامارانو لوبډلې لومړۍ توپوهنه ترسره کړه او په ټاکلو شلو اورونو کې یې د پنځو لوبغاړو په سوځېدو ۱۹۴ منډې وکړې.
یاده لوبه کې د بند امیر ښامارانو لوبډلې له لوري صدیقالله اتل ۱۱۲، هارون خان ۳۱ او حشمتالله شهیدي ۲۵ منډې وکړې.
د بست ساتونکو لوبډلې له لوري په توپاچونه کې بشیراحمد دوه او کریم جنت د بند امیر ښامارانو لوبډلې یو لوبغاړي وسوځول.
د بست ساتونکو لوبډلې ورکړل شوی هدف په شلم اور کې د ۷ لوبغاړو په سوځېدو پوره کړ او د درېیو وېکټو په توپیر یې د بند امیر لوبډلې ته ماتې ورکړه.
د بست ساتونکو لوبډلې له لوري په توپوهنه کې نجیبالله ځدراڼ ۵۵، محمداصف ۴۰، کریم جنت ۳۱ او ا کبر موسیزي ۲۷ منډې جوړې کړې.
په یاده لوبه کې اللهمحمد غضنفر درې، سید شېرزاد او ننګیال خروټي د بست ساتونکو لوبډلې ۲ – ۲ لوبغاړي وسوځول.
د یادونې ده، په شپږیزه کرکټ لیګ سیالیو کې به بله لوبه نن دوه بجې د سپینغر او د امو نهنګانو لوبډلو ترمنځ ترسره شي.
