ښځې

د ملګرو ملتونو د خوړو او کرنې سازمان اعلان کړی چې په ۲۰۲۴ کال کې یي په افغانستان کې د کورنیو له ۱۵ زره سرپرستو ښځو سره مرسته کړې ده.

هرات کې یوې سوداګرې په دغه ولایت کې دوو سوو نورو ښځو ته د زعفران او وچې مېوې د پروسس او بسته‌بندۍ برخه کې د کار زمینه برابره کړې ده.

لغمان کې یو شمېر سوداګرې میرمنې له حکومته غوښتنه کوي چې په دغه ولایت کې دې د ښځو ځانګړي سوداګریز مارکېټ د جوړولو درېدلې چارې بېرته پیل کړي.

د قطر د نړۍوالو همکاریو وزیرې لولوه الخاطر ژمنه کړې چې د زده‌کړو او روغتیایي مراقبتونو برخو کې د افغانستان د ښځو د ملاتړ لپاره ۷۵ میلیون ډالر مرسته کوي.

جوزجان کې ځینې انځورګرې نجونې له مسوولینو غواړي چې د هنري، په ځانکړې توګه د انځورګرۍ نندارتونونو په جوړولو سره د دوی ملاتړ وکړي.

بامیان کې یو شمېر سوداګرې ښځې سیمه‌ییزو تولیداتو ته د پلور ‎بازار له نشتوالي او د اړوندو بنسټونو له نه ملاتړه شکایت کوي او په دې برخه کې د حکومته پاملرنه غواړي.‎

بغلان کې د ښځو د لاسي صنایعو د کارخونو مسوولانې وايي، د پخوا په پرتله اوس له دوی سره په کارخونو کې کار کولو ته د نجونو لېوالتیا ډېره شوې چې لامل یې له شپږم ټولګي پورته د نجونو پر مخ د ښوونځيو او پوهنتونونو ځنډېدل دي.

هرات کې یوه ښځه چې د یونیم میلیون افغانیو په پانګونه یې د ښځو لپاره ځانګړی رسټورانټ جوړ کړی وايي، دلته د خوړو خدماتو ترڅنګ ښځو ته د افکارو د تبادلې او مطالعې مناسب چاپېریال هم برابر شوی دی.

نیمروز کې د شکېبا په نوم یوه ښځه چې د دغه ولایت په مرکز زرنج ښار کې یې د عکاسي او فوټوکاپي دوکان جوړ کړی وايي، که ملاتړ یې وشي، خپل کاروبار به پراخ کړي او ډېرې نورې ښځې به پر کار وګوماري. 

جوزجان کې یو شمېر هغه مېرمنې چې انلاین کسب او کار ته یې مخه کړې، وايي، په دې وروستیو کې یې کاروبار وده کړې؛ اوس د دې تر څنګ چې هېواد کې دننه پېرېدونکي لري، له امریکا، کاناډا او ځینو اروپایي هېوادونو هم ډېر سفارشونه ترلاسه کوي.

د امر بالمعروف او نهې عن‌المنکر وزارت مسوولین وايي، په تېر کال کې «د ښځو پر وړاندې د تاوتریخوالي د ۲۶۳۸ مواردو او د ښځو د پلور د ۲۹۵ مواردو» مخه نیول شوې او دغه‌راز د رسنیو نشرات ۹۰ سلنه اصلاح شوي دي.

د دایکنډي په مرکز نیلي کې یو شمېر خیاطانې او خامک‌ګنډونکې د خپل کاروبار پر کمرنګه کېدو اندېښنه څرګندوي او له حکومته غواړي چې د مناسب ځای او کاري امکاناتو برابرولو ترڅنګ دې د دوی تولیداتو ته د بازارموندنې په موخه نندارتونونه جوړ کړي.