خواجه نصیراحمد صدیقی

د افغانستان د ملي امنیت شورا طالبان د دوحې له تړون څخه په سرغړونې تورنوي او وايي چې دغې ډلې نه تاوتریخوالی کم کړی او نه یې له القاعده شبکې سره خپلې اړیکې پرې کړې دي.

امریکا د افغانستان له ملي دفاع وزارت سره د ۶۴۰ عرادو پوځي وسایطو مرسته وکړه.

د افغانستان د بهرنیو چارو وزیر محمد حنیف اتمر په یوه رسمي سفر د روسیې پلازمېنې مسکو ته لاړ.

په افغانستان کې د ملګرو ملتونو دفتر یوناما وايي چې په قطر کې د بین الافغاني خبرو له پيلېدو وروسته د ملکي وګړو په مرګ ژوبله کې زیاتوالی راغلی او په تېر یوه کال کې تر اتو زرو ډېرو ملکي وګړو ته مرګ ژوبله اوښتې ده.

لويه څارنوالي وايي چې د پوهنې وزارت د تهيه او تدارکاتو رييس او د وارث سير شرکت رييس  د فساد په تور نيول شوي دي.

د ولسمشر مرستيال امرالله صالح وايي چې د کابل ښار په پرونۍ چاودنه کې څلور کسان وژل شوي او پنځه نور ټپیان دي.

ملي امنيت په کابل کې د داعش او حقاني شبکې د پنځه کسيزې ډلې د نيولو خبر ورکړى دى.

د افغانستان بانک وايي چې د صرافانو شرکتي جواز اخیستو پروسه کې ټولې ستونزې هوارې شوې دي.

د امريکا د بهرنيو چارو وزير په افغانستان کې د تاوتریخوالي پر زیاتېدو اندېښنه ښودلې، دغه راز د جګړې او تاوتریخوالي پر درېدو او د افغانستان د ستونزې پر سياسي حل يې ټينګار کړی دی.

د ولسمشر لومړی مرستیال امرالله صالح وايي، د پاکستان له ملاتړ پرته به طالبان د یوه وسله وال جریان په توګه د شپږو میاشتو لپاره د ژوندي پاتې کېدو توان ونه لري.

د کورنيو چارو وزارت وايي چې د ښار جوړولو او ځمکو وزارت د مالي او اداري عمومي رييس په ګډون لس کارکوونکي د فساد او اختلاس په تور نيول شوي دي.

د امريکايي ځواکونو مرکزي قوماندانۍ قوماندان د پاکستان د پوځ له مشر جنرال باجوه سره پر افغان سوله خبرې کړې دي.