احمدصهیب حسرت

ملي دفاع وزارت وایي، بامیان کې یې د ۲۷ میلیون ډالرو په ارزښت دوه مجسمې، دوه مومیایي جسدونه، یو د سرو زرو تاج، یو په سرو زرو لیکل شوی کتاب او ځيني نور لرغوني اثار او عتیقه توکي نیولي دي.

کابل ښاروالي وایي، د حشمت خلیل کرزي کورنۍ یو زمری، یو شترمرغ، ۱۶ چینايي هیلۍ، دوه زاڼې او دوه تیتر د کابل ژوبڼ ته ډالۍ کړل.

د ازموینې ملي اداره وایي، هغه کسان چې د کانکور ازموینه کې یې لوړې نومرې اخستې دي خو د خپلې خوښې پوهنځي ته نه دي بریالي شوي، کولی شي د خپلو نومرو مطابق بل پوهنځی انتخاب کړي.

د لوړو زده‌کړو سرپرست وزیر شيخ نداءمحمد نديم وایي، په هیڅ وجه نه ځان او نه هم نورو ته د دې اجازه ورکوي چې په هېواد کې له تحصیلي نظامه سیاسي استفاده وکړي.

د ریاست‌الوزرا اداري مرستیال په افغانستان کې د ترکیې له سفیر سره د مخه ښې په لیدنه کې ویلي، ترکیه دې د افغان کډوالو په مسایلو کې لازمه همکاري وکړي او افغان سوداګرو ته دې د ویزو په ورکړه کې اسانتیاوې رامنځته کړي.

د ټولګټو وزارت وایي، د شمال لویه لار ۱۱ ورځې وروسته د سالنګ تونل کې د کانکرېټ‌اچونې چارو تر بشپړېدو د هر ډول ترافیکو پر مخ تړل کېږي.

د کورنیو چارو سرپرست وزیر وایي، ا.ا د یووالي او ابادۍ پخه اراده کړې، د غچ اخیستو فکر نه لري او نه چا ته اجازه ورکوي غچ واخلي او زیاتوي، پرمختګ هغه مهال ممکن دی چې ولس نظام او نظام ولس د ځان وبولي.

د افغانستان لپاره د روسیې ځانګړي استازي ویلي، د مسکو فارمټ غونډه کې به له ترهګرۍ او نشه‌يي توکو سره پر مبارزه خبرې وشي، خو ګډونوال به یې په افغانستان کې د ټول‌ګډون حکومت پر جوړښت ډېر تمرکز ولري.

مالیې وزارت وایي، اهل ته د کار سپارلو په موخه یې د پوهنتونونو له ممتازو ۳۲۰ محصلینو په دغه وزارت کې د ګومارنې په موخه ازموینه واخیسته او دغه چاره به هر کال ترسره کوي.

د ملي دفاع وزارت وایي، په کندهار کې د هوایي ځواک لوا د هوایي تخنیک انجنیري ټيم په پرله‌‎پسې هڅو یوه MD530 چورلکه ترمیم او الوتنې ته یې چمتو کړې ده.

د افغانستان لپاره د امریکا متحده ایالتونو ځانګړی استازی توماس ویسټ وایي، افغان ښځې او نجونې د افغانستان راتلونکي لپاره ستره شتمني ده او خپلو وړتیاوو ته د رسيدو لپاره یې زده‌کړو ته د بشپړ لاسرسي حق لري.

اسلامي امارت اقصی جومات ته «د اسراییلیانو ننوتل او دغه جومات بې حرمتي» غندي، وایي  دغه کار د نړۍوالو اصولو خلاف دی او باید دا ډول کړنې ژر ودرول شي.