کابل (پژواک ٨ليندۍ٩٠): ولسمشر حامدکرزی وايي چې دبون په کنفرانس کې به نړیواله ټولنه تر۲۰۱۴ زیږديز کال وروسته دلسو کلونو لپاره له افغانستان سره خپله همکاري اعلان کړي.
د ولسمشرۍ له مطبوعاتي دفتر څخه پژواک ته په راليږل شوې خبرپاڼه کې ويل شوي دي ولسمشر کرزي د پارلمان د اصلاح غوښتونکيو له ډلې سره په کتنه کې خبره کړې ده.
خبرپاڼې د کرزي په حواله ليکلي دي:(( زه به په دغه کنفرانس کې په تیرو لسو کلونو کې د نړیوالې ټولنې او افغانستان د ګډو لاس ته راوړنو، د موازي جوړښتونو او د امنیت د نه شتون له امله د نا کامیو، د اقتصادي بنسټونو بیا رغونې ته د نه پاملرنې، د سولې د بهیر او له نړۍ سره د ستراتیژیکو همکاریو په اړه وینا وکړم.))
د افغانستان په اړه به د بون کنفرانس د راتلونکې ميلادي مياشتې په پنځمه په المان کې جوړ شي، چې د سلو هېوادونو او نړيوالو سازمانونو استازي به پکې ګډون وکړي.
