کندهار-اسعداباد (پژواک ١٦ وږى ٩٢): دولتي چارواکي وايي، چې په کندهار او کونړ ولايتونو کې د وسله والو طالبانو له خوا په بريدونو کې ١١ ملکي وګړو ته مرګ ژوبله اوښتې ده.
د کندهار ولايت د مطبوعاتي دفتر مسوول جاوېد فيصل د وږي په ١٦مه پژواک خبري اژانس ته وويل، چې تېره شپه په ميوند ولسوالۍ کې د وسله والو طالبانو له خوا د هاوان يوې توغول شوې مرمۍ د ښځو او ماشوانو په ګډون ٦ کسانو ته مرګ ژوبله اړولې ده.
هغه پژواک اژانس ته وويل، چې دغه مرمۍ د ميوند ولسوالۍ د سوربغل په سيمه کې پر يوه کور لګېدلې ده.
فيصل زياتوي، چې په دې پېښه کې څلور ښځې ټپيانې شوې، يوه نجلۍ او يو هلک وژل شوي دي.
د نوموړي په وينا، چې ټپيان د افغان ملي امنيتي ځواکونو له خوا روغتون ته لېږدول شوي دي.
د يو بل خبر له مخې، په کونړ ولايت کې هم د وسله والو طالبانو د هاوان په يوه بريد کې پنځه عام وګړي ټپيان شوي دي.
د کونړ والي شجاع الملک جلاله وايي، چې تېر مازديګر د اسمار ولسوالۍ اړوند د ججي په سيمه کې د وسله والو د هاوان مرمۍ لګېدو چې د يوه کور په خوا کې لګېدلې، پنځه ماشومان ټپيان کړي دي.
د هغه په وينا، په دې پېښه کې څلور ماشومان، چې وروڼه کېږي، ټپيان او د درملنې په موخه روغتون ته لېږدول شوي دي.
د دغه ولايت د پوهنې رياست وايي، ياد څلور ماشومان په ننګرهار د پښتونستان لېسې زده کوونکي وو او اوس خپلو کورنو ته په رخصتى تللي وو.
تر اوسه وسله والو طالبانو په دې اړه څه نه دي ويلي.
