<p>کابل (پژواک، ۳۱ غبرګولی ۹۸): د ولسمشرۍ یو نوماند د ټاکنو په چارو کې د ارګ له لاسوهنې اندېښنه ښيي او وايي چې خپله ولسمشر د ټاکنو په چارو کې مداخله کوي.</p>
<p>د ولسمشرۍ ټاکنو یو نوماند محمد شهاب حکیمي په داسې حال کې د ټاکنو په چارو کې د ارګ له لاسوهنې اندېښنه ښيي چې د ټاکنو خپلواک کمېسیون مرستیال مولانا عبدالله پرون (د غبرګولي ۳۰مه) په ارګ کې ځیني کسان د یاد کمېسیون د کارکوونکو په ګومارنو کې پر مداخلې تورن کړل.</p>
<p>خو حکیمي څرګنده کړه چې به ارګ کې هېڅ یوه کړۍ د کمېسیون په ګومارنو کې مداخله نه کوي، بلکې خپله ولسمشر مداخله کوي.</p>
<p>نوموړي د ټاکنو په چارو کې د ارګ پر مداخلې د نیوکې تر څنګ وویل: ((موږ د ولسمشرۍ نوماندانو له دې مخکې هم د ټاکنو په چارو کې د ارګ پر لاسوهنو اندېښمن وو او اوس هم یو، تر څو چې زموږ اندېښنې نه وي رفع شوې، پر رڼو، عادلانه او ټول منلو ټاکنو شک لرو.))</p>
<p>هغه وویل چې په ارګ کې کړۍ نشته، بلکې ولسمشر د هدایت له مخې، مستقیماً د ټاکنو په چارو کې مداخله کوي.</p>
<p>هغه زیاته کړه: ((ارګ په ځانګړې توګه ولسمشر هېڅکله نه غواړي چې د افغانستان د خلکو لپاره رڼې، عادلانه او ټولمنلې ټاکنې ترسره کړي، له همدې امله پرون د ټاکنو کمېسیون مرستیال په ډاګه د ټاکنو په کمېسیون د ارګ له لاسوهنې اندېښنه وښوده.))</p>
<p>حکیمي وویل، هغه حکومت چې د درغلۍ او سرغړونو پر اساس جوړ شوی وي، هېڅکله د رڼو ټاکنو ترسره کولو اراده نه لري.</p>
<p>هغه زیاته کړه: ((موږ د ټاکنو کمېسیون په چارو کې د ارګ له لاسوهنو د پردې پورته کولو برخه کې د مولانا محمد عبدالله له دریځه ملاتړ کوو او له نورو کمېشنرانو هم غواړو چې خپله خپلواکي وساتي.))</p>
<p>هغه له ولسمشر او د هغه ټیمه وغوښتل څو د ټاکنیزو کمېسیونونو غړو ته وخت ورکړي چې خپل کارونه په پوره خپلواکۍ کې ترسره کړي څو د رڼو، عادلانه او سراسري ټاکنو شاهدان و اوسو.</p>
<p>هغه خبرداری ورکړ، که د ارګ لاسوهنې دوام پیدا کړي، د ولسمشرۍ ټاکنو نوماندان به نه یوازې په ټاکنو کې ګډون ونه کړي، بلکې ټاکنې به تحریم کړي.</p>
<p>خو د ولسمشر مرستیال ویاند شاه حسین مرتضوي د ټاکنو کمېسیون په چارو کې د ارګ د لاسوهنې د رد تر څنګ ویلي: ((ګومارنې د ټاکنیزو کمېسیونونو او اداري اصلاحاتو له واکونو څخه دي او ارګ په دې برخه کې دخیل نه دی.))</p>
<p>هغه څرګنده کړې ده چې مولانا عبدالله د دې پر ځای چې عامه افکار ګډوډ کړي او ټول یاد کړي، ښه به دا وي چې تورنې کړۍ رسنیو او خلکو ته افشا کړي.</p>
<p>ټاکل شوې د ولسمشرۍ ټاکنې د روان کال د تلې په شپږم ترسره شي او د دې څوکۍ لپاره به ۱۸ نوماندان په خپلو کې رقابت وکړي.</p>
