کندوز کې ١٢ ملکي وګړو ته مرګ ژوبله اوښتې

کندوز ښار (پژواک، ٢١ تله ٩٩): د کندوز امنيتي مسوولين وايي چې په کندوز ښار کې د هاوان مرمۍ د لګېدو له امله پنځه ملکي وګړي وژل شوي او اووه نور ټپيان شوي دي.

د کندوز د امنيې قوماندانۍ وياند هجرت الله اکبري د تلې په ٢١مه پژواک خبري اژانس ته وويل چې نن له غرمې مخکې د کندوز ښار اړوند د شوراب قشلاق په سيمه کې پر يوه کور د هاوان مرمۍ لګېدلې ده.

هغه وايي چې په دې پېښه کې پنځه ملکي وګړي وژل شوي او اووه نور ټپيان شوي دي.

اکبري تور پورې کړ چې د هاوان دغه مرمۍ د وسله والو طالبانو له لوري توغول شوې ده.

همدارنګه د شوراب قشلاق سيمې يوه اوسېدونکي سيد رحيم پژواک ته وويل چې نن سهار د دوى سيمې ته امنيتي ځواکونه د عملياتو په موخه ورغلي دي.

هغه وايي: ((هو پر يوه کور د هاوان مرمۍ لګېدلې ده، خلک په کې وژل شوي دي خو معلومه نه ده چې دغه مرمۍ چا توغولې ده.))

بل لورته وسله والو طالبانو تر اوسه په دې اړه څه نه دي ويلي.