​غور کې د روغتون لپاره تر ۱۸ چنده پورې توکي په لوړه بیه پېرل شوي

کابل (پژواک، ۲۸ تله ۹۹): سندونه ښیي چې په غور کې د روغتون لپاره د چایو یو ترموز په ۱۹۰۰۰ افغانۍ پېرل شوی او د انتظار یوه څوکۍ د بازار له نرخه ۱۸ برابره او په ټوله کې ۴۳ قلمه توکي ۱۱ میلیونه افغانۍ په لوړه بیه پېرل شوي دي.

د سند له مخې، دغه توکي تېر کال د تلې په میاشت کې پېرل شوي، خو د یاد روغتون مسوول وایي چې تر اوسه دغه توکي یاد روغتون ته نه دي رسېدلي.

پژواک خبري اژانس د غور د عامې روغتیا ریاست د ۱۳۹۸ کال د تلې د لومړۍ نېټې وړاندیزپاڼه ترلاسه کړې ده.

په وړاندیز کې راغلي چې د غور د شهرک ولسوالۍ د دېرش بستریز روغتون د دفتري تجهیزاتو د ۱۹ میلیونه، ۹۱۶زره او ۹۵ افغانۍ تړون د «اسپایر اریا» په نوم له یوه لوژستیکي او غذايي شرکت سره شوی دی.

په وړاندیز کې راغلي چې د روغتیا وزارت د مقام د مخکنۍ لارښوونې له مخې، شرکت ۵۰ ډوله وسایل د تدارکاتي پړاوونو له وهلو وروسته اکمال کړي او د موظف پلاوي له تشریح وروسته دغه توکي د اړوند معتمد په جمع قید شوي دي.

په وړاندیز کې د عامې روغتیا وزارت له مقامه غوښتل شوي چې د غور مستوفیت ته د یادو پیسو د تخصیص په اړه هدایت ورکړي.

دغه وړاندیز د غور د عامې روغتیا مشر ډاکتر جمعه ګل یعقوبي لاسلیک کړی او د عامې روغتیا وزارت مالي ریاست لیکلي چې په دې اړه دې اصولي اجراات وشي.

پژواک د یادو اخیستل شوو توکو د بیو جدول کاپي هم ترلاسه کړې او له یادو پنځوس قلمه توکو یې د ۴۳ قلمه نرخونه له بازاره اخيستي، خو د پاتې ۷ قلمه بیې یې ځکه نه دي اخیستې چې د ځینو بیې یې توپیر نه لري او د ځینو ځانګړتیاوې سمې څرګندې نه دي.

د یادو توکو هغه بیې چې په جدول کې ښودل شوي، د بازار له لوړو بیو سره پرتله شوي، خو بیا هم ډېر توپیر لري.

دغه ۴۳ قلمه توکي له یو نه تر ۱۸ برابره په لوړه بیه پېرل شوي دي.

سند او د بازار بیې ښیي چې د انتظار څوکۍ هر یوه ۱۸ برابره، د وښو رېبلو یو ماشین ۱۴ برابره، یو د اوبو ډيسپلېسر یخچال ۱۱ برابره، یو ۷ نفره چرمي کوچ د چای له مېز سره، د چای څښلو لوښو یو سیټ او یوه یو کسیزه اسفنجي دوشکه ۹ برابره، یو عشاریه څلوېښت متره د تحریر مېز او د خوب یو کسیز چپرکټ ۸ برابره او د چپرکټ د څنګ مېز، د اور ضد یوه ډبه او د لرګي یوه المارۍ ۷ برابره د بازار له نرخ نه په لوړه بیه پېرل شوي دي.

دغه راز یوه نکلي څرخي څوکۍ، د درملو یوه فلزي المارۍ، کوډبند، یوه چرمي څوکۍ او یوه سپینه تخته ۶ برابره، یو پنځه لېتره ترموز، یو عشاریه شپېته سانتي متره د تحریر مېز، ۳۲ اینچه چيناني سوني ټلوېزیون، برقي جاروب او د ۸۰ پر ۲۰۰ سانتي متره کې د کالیو المارۍ پنځه برابره، یو ګرین بورډ، د ایرکنډېشن لګولو چارو ترسره کول او د غونډو شپږه متره مېز، د بازار له نرخ نه څلور برابره په لوړه بیه حساب او پېرل شوي.

دغه راز بیې ښیي چې یو ۱۳۰ اېچ پي درې کاره پرېنټر، یوه برقي او ګازي ترکي بخارۍ له لس کیلویي ډبې سره او د پروجکټور ملتي میډیا پرده د بازار له نرخه درې برابره، دیارلس قلمه نور توکي دوه برابره او یو پاکستانی یخچال شاوخوا یو برابر په لوړه بیه پېرل شوي دي.

د بیو پرتله ییز جدول

پژوک ته د یادو توکو نرخونه په کابل کې د وحیدالله فرنېچر پلورنځي، ډیګ کام کمپوټر پلورنځي، عبدالقهار عظیمي سوداګریز شرکت، نېشنل قرطاسیه پلورنځي، امین الله زرنج پلورنځي او انار درګي لېمټيډ شرکت ورکړي دي.

د یو کال په تېرېدو سره توکي روغتون ته نه دي رسول شوي

د غور ولایت د شهرک ولسوالۍ روغتون مسوول همایون فضل پژواک خبري اژانس ته وویل چې د روغتون لپاره یاد پېرل شوي توکي تر اوسه (د تلې ۲۳مه) دغه روغتون ته نه دي رسېدلي.

دی وايي: “په غور کې د روغتیا ریاست مسوولینو ویلي چې دغه وسایل اخیستل شوي او د امنیتي وضیعت په ښه کېدو سره به دغه امکانات روغتون ته ولېږل شي.”

د نا اړینو توکو پېر

همایون فضل وایي چې یاد روغتون ته په پېرل شوو توکو کې د وښو رېبلو ماشین او زرنج موټرسایکلونه هم شامل دي چې روغتون ته یې اړتیا نشته.

د پژواک خبریال د شهرک ولسوالۍ د ۳۰ بستریز روغتون له مسوول څخه وپوښتل چې د دغه روغتون لپاره یې د کومو وسایلو وړاندیز کړی؟ هغه وویل: “روغتون ته د ډېرو شیانو اړتیا ده، د عملیات د مېز، د عملیات خونې توکو، اکسېجن، چپرکټونو، دوشکو او کمپلو وړاندیز مو ورکړی دی؛ فکر کوم ټول شیان اخیستل شوي دي.”

پژواک د تلې په ۲۳مه د غور د عامې روغتیا له رییس جمعه ګل یعقوبي سره اړیکه ټینګه کړه او د یادو توکو په لوړه بیه د پېر موضوع یې ورسره شریکه کړه، خو ویل یې چې یوه ورځ وروسته (د تلې ۲۴مه) به معلومات ورکړي، خو د تلې په ۲۶مه یې وویل چې دی په کابل کې دی او کله چې غور ته ولاړ، په دې اړه به معلومات ورکړي.

د عامې روغتیا وزارت ویاند مرستیال نورالله ترکی وایي چې دغه موضوع د وزارت تر داخلي پلټنې لاندې ده او هرکله چې د پلټنې پایله معلومه شوه، په اړه به یې رسنیو ته معلومات ورکړي.

له «اسپایر اریا» شرکت سره چې دغه توکي یې پېرلي، اړیکه ټینګه نه شوه. یاد شرکت د افغانستان له سوداګرۍ او صنایعو وزارت سره ثبت دی او د جواز ګڼه یې (D-32179) ده.

یارمحمد د دغه شرکت مشر او نظرمحمد یې مرستیال دی. دغه شرکت له دې وړاندې هم د یو تړون له مخې د عامې روغتیا وزارت ته یو جنراتور پېرلی و.