ولسي جرګه: حکومت دې د پنځو وزارتونو لپاره نوي نوماندان ژر را معرفي کړي

کابل (پژواک، ٢٤ لېندۍ ۹۹): د ولسي جرګې رييس مير رحمان رحماني يو ځل بيا له حکومته غوښتي چې د هغو نوماندان وزيرانو پر ځاى نوي معرفي کړي چې د باور رايي په اخيستو کې پاتې راغلي دي.

دا په داسې حال کې ده چې د افغانستان حکومت څه وخت مخکې د نوې کابینې ۲۵ نوماند وزیران ولسي جرګې ته د باور رایو اخیستو لپاره معرفي کړي وو.

خو له يادو ۲۵ نوماند وزیرانو يې ۲۰ هغو د باور رايې ترلاسه کړې او پاتې نورو پنځو نوماند وزيرانو له ولسي جرګې د باور رايه ترلاسه نه کړه.

د ولسي جرګې رييس مير رحمان رحماني نن (د لېندۍ ٢٤مه) د جرګې عمومي غونډې ته وويل چې حکومت دې د پنځو هغو وزيرانو پر ځای نور وزيران ولسي جرګې ته معرفي کړي چې له دې جرګې يې د باور رايې نه دي اخيستي.

د نوموړي په وينا، سرپرست وزيران بېځايه او غير قانوني ګومارني کوي او حکومت بايد د دغه کار مخه ونيسي.

رحماني زياته کړه، ولسمشر دې وړ کسان د نوماند وزيرانو په توګه ولسي جرګې ته ور وپېژني.

Views: 2