غزني ښار (پژواک، ٢٩ ورى ١٤٠٠): د غزني په قره باغ ولسوالۍ د حکومتي ځواکونو او طالبانو ترمنځ د پرله پسې جګړو له امله سلګونه کورنۍ نورو سيمو ته بېځایه شوې دي.
وسله والو طالبانو څلور ورځې مخکې د قره باغ ولسوالۍ کلابنده کړې او له څو لورو يې بريدونه پرې پيل کړي دي.
د قره باغ اوسېدونکي محمد اکبر د وري په ٢٩مه پژواک خبري اژانس ته وويل چې له تېرو څو ورځو راهيسې د ولسوالۍ په بازار او نورو سيمو کې د حکومتي ځواکونو او طالبانو ترمنځ جګړې روانې دي.
هغه وايي: ((طالبان د بازار په شاوخوا سيمو کې ځاى پر ځاى شوي، خلک بازار ته نه پرېږدي چې له امله يې بازار هم تړل شوى دى.))
د هغه په وينا، په تېرو څو ورځو کې سلګونه کورنۍ له دې ولسوالۍ نورو سيمو ته کډه شوې دي.
همدارنګه د قره باغ د لايغ سيمې اوسېدونکي نصرالله پژواک ته وويل چې طالبانو د دې ولسوالۍ لايغ کلا، کلبي کلا، بهبود کلا، ګوډلې کلا او ځينې نورې سيمې نيولې او له هغه ځايه پر حکومتي ځواکونو بريدونه کوي.
هغه وايي: ((طالبانو ولسوالۍ ته تللې ټولې لارې بندې کړې او ماينونه يې په کې ځاى پر ځاى کړي دي.))
د قره باغ ولسوالۍ يوه اوسېدونکي محمد انور په غزني ښار کې پژواک ته وويل چې دوه ورځې وړاندې يې کډه غزني ښار ته راوړې ده.
ده زياته کړه: ((زه د نسوخېلو اوسېدونکى يم، زموږ له سيمې، لايغ سيمې او ګوډلو ډېرو خلکو کډې بار کړې يو او بله خوا ځي، دا څو ورځې سخت جنګونه دي.))
همدارنګه د قره باغ بل اوسېدونکي شمس الله پژواک ته وويل: ((زما پر دوکان راکټ لګېدلى دى، لکونه تاوان راته اوښتى، اوس يې تاوان څوک راکوي طالب که حکومت؟))
د دې ولسوالۍ يو شمېر نورو اوسېدونکو هم ورته څرګندونې وکړې او ويې ويل چې په دې ولسوالۍ د امنيت ټينګښت په موخه بايد پراخ عمليات ترسره شي.
په دې اړه د قره باغ ولسوال عبدالله خيرخواه پژواک ته وويل چې په دې ولسوالۍ د پرله پسې جګړو له امله يو شمېر کورنۍ نورو سيمو ته کډه شوې دي.
هغه وايي: ((طالبان د خلکو په کورونو کې ځاى پر ځاى شوي، له هغه ځايه پر ولسوالۍ او امنيتي ځواکونو ډزې کوي.))
همدارنګه د غزني امنيه قوماندان مل پاسوال حکمت الله کوچى هم د قره باغ جګړه تاييدوي او وايي چې طالبان د خلکو په کورونو کې پټيږي نو ځکه دوى نه شي کولاى عمليات ګړندي کړي.
قوماندان وايي چې په قره باغ کې طالبانو له څو لورو بريدونه پيل کړي خو د حکومتي ځواکونو له کلک مقاومت سره مخ دي او پرمختګ نه شي کولاى.
بلخوا د غزني د کډوالو رييس درمحمد سردارزوى وايي چې په تېرو څو ورځو کې له قره باغ ولسوالۍ شاوخوا اته سوه کورنۍ نورو سيمو ته کډه شوې دي.
د نوموړي په وينا، له يوې سروې وروسته به له بېځايه شوو کورنيو سره مرستې ترسره شي.
بل لور ته طالبان هم د قره باغ جګړه تاييدوي.
د دې ډلې وياند ذبيح الله مجاهد وايي چې طالبانو د قره باغ ولسوالۍ محاصره کړې چې تر اوسه ١٥ حکومتي سرتېرو ته مرګ ژوبله اوښتې.
دا په داسې حال کې ده چې تېره ماښام په قره باغ ولسوالۍ کې د ماين چاودنې له امله څلور ملکي وګړي وژل شويدي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن