په مالیزیا د صباح ایالت کې اورلګېدنه؛ شاوخوا زر کورونه ویجاړ او زرګونه کسان بې‌ځایه شوي

<p style="text-align: justify;">د مالیزیا د صباح ایالت په یوه پراخه اورلګېدنه کې شاوخوا زر کورونه ویجاړ شوي او زرګونه کسان بې‌ځایه شوي دي.</p>

<p style="text-align: justify;">د رویټرز د راپور له مخې، دا اورلګېدنه نن د بورنیو ټاپو د صباح ایالت د سنداکان سیمې په یوه ساحلي کلي کې رامنځته شوې ده.</p>

<p style="text-align: justify;">د اوروژنې مسؤلینو ویلي، دا پېښه د شپې شاوخوا ۱:۳۲ بجې پیل شوې او د سختو بادونو او د کورونو د نږدېوالي له امله په چټکۍ سره خپره شوې ده.</p>

<p style="text-align: justify;">همدارنګه ویل شوي، د سمندر د اوبو ټیټې کچې د اور د مهار بهیر له ستونزو سره مخ کړی او د اوبو سرچینو ته لاسرسی یې ستونزمن کړی دی.</p>

<p style="text-align: justify;">راپور زیاتوي، دا اورلګېدنه په یوه «اوبیز کلي» کې شوې چې کورونه یې پر لرګینو ستنو جوړ شوي او ډېری اوسېدونکي یې د بې‌وزلو قشرونو، په ځانګړي ډول بې‌تابعیته کسانو او بومي ډلو پورې تړاو لري.</p>

<p style="text-align: justify;">د پولیسو په وینا، له ۹ زرو ډېر کسان له دې پېښې اغېزمن شوي، خو تر اوسه د مرګ‌ژوبلې راپور نه دی ورکړل شوی.</p>

<p style="text-align: justify;">د مالیزیا لومړي وزیر ویلي، مرکزي حکومت له سیمه‌ییزو چارواکو سره د بېړنیو مرستو او د زیانمنو کسانو د لنډمهالي استوګنځای د برابرولو لپاره همکاري کوي او ټینګار یې کړی چې د خلکو خوندیتوب او بیړنۍ رسېدنه لومړیتوب دی.</p>