لښکرګاه (پژواک، ١٣ چنګاش ١٤٠٠): د هلمند په نهرسراج ولسوالۍ کې يو موټربم موخې ته له رسېدو وړاندې له منځه وړل شوى دى.
په هلمند ولايت کې د ٢١٥ ميوند قول اردو د يوې خبرپاڼې په خپرولو سره ويلي دي چې تېره شپه په ٦٠١ نمبر شاهراه سيمه کې يو موټربم د هوايي بريد پرمهال له منځه وړل شوى دى.
سرچينه وايي: "يوه ځانمرګي بريدګر چې غوښتل یې له چاودېدونکو توکو ډک يو عراده موټر د هلمند د نهرسراج ولسوالۍ د ۶۰۱ نمبر شاهراه پر لويه لار پر مېشتو امنيتي ځواکونو بريد ترسره کړي؛ خو خپل هدف ته تر رسېدو وړاندې د افغان هوايي ځواکونو له خوا په نښه او په پايله کې موټربم له منځه یوړل شو."
همدارنګه د ملي دفاع وزارت مرستيال وياند فواد امان هم په خپله ټویټر پاڼه کې ليکلي چې په هلمند کې يو موټربم موخې ته له رسېدو وړاندې له منځه وړل شوى دى.
بل لورته د دولت وسله والو مخالفينو تر اوسه په دې اړه څه نه دي ويلي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن