مزارشريف (پژواک، ۱۷زمری ۱۴۰۰): د بلخ ولايت په مرکز مزارشريف ښار کې له دولتي ښوونځيو سره د اعانې په نوم د مرستو لړۍ پيل شوه.
مسوولين وايي چې په دغه پروګرام کې به ټولټال د نجونو ۵۱ ښوونځي تر پوښښ لاندې ونيول شي.
د بلخ د پوهنې رياست د ښوونځيو د شوراګانو مدير روزبه سعادت د زمري په ۱۷مه، پژواک اژانس ته وويل چې د دغه پروګرام موخه له هغو زده کوونکو سره مرسته کول دي چې د بې وزلۍ له امله زده کړو ته دوام نه شي ورکولی.
ده زياته کړه چې دغه برنامه د پوهنې وزارت د اقرا برنامې له خوا پلې کېږي چې د هېواد په ۱۷ ولايتونو کې د ښوونځيو لپاره ټولټال ۵ ميليونه ډالر ځانګړي شوي دي.
هغه وويل: ((بلخ ولايت کې په لومړي ګام کې ۵۱ ښوونځيو سره مرسته کېږي، چې ۲۵ ښوونځي په مزار ښار او ۲۶ ښوونځي په ولسواليو کې ټارګيټ شوي دي)).
د سعادت په خبره، په دغه برنامه کې به د ځانګړو شويو ښوونځيو د ډلې هرې لېسې لپاره ۲۵۰۰ امريکايي ډالر، له هر منځني ښوونځي سره ۱۹۰۰ ډالر او هر لومړني ښوونځي سره به ۱۴۰۰ امريکايي ډالر مرسته کېږي.
د هغه په وينا، که دغه لړۍ بريالۍ وه، نو بل ګام کې به نور ښوونځي هم تر پوښښ لاندې ونيسي.
د بلخ د پوهنې رييس علي الله اميري پژواک ته وويل چې د دغه پروګرام موخه له هغو زده کوونکو سره مرسته کول دي چې د بېوزلۍ له امله له زده کړو څخه د پاتې کېدو له خطر سره مخ دي.
نوموړي زياته کړه: ((زموږ په ښوونځيو کې د يو شمېر بېوزله کورنيو زده کوونکي شته، چې حتی د ښوونځي د يونيفورم، کتابونو او نورو اړتياوو د اخيستو اقتصادي توانايي نه لري، په دې برنامه کې د دې اړتياوو د پوره کولو تر څنګ پلان دا دی چې حتی يو شمېر زده کوونکو لپاره د ظرفيت لوړونې ځانګړي کورسونه پيل کړو)).
هغه همدا راز وويل چې د اعانې دغه لړۍ بله موخه دا ده څو کورنۍ وهڅول شي او خپل اولادونه په ځانګړي ډول لوڼې ښوونځيو کې شاملې کړي.
مزارشريف کې د سلطان راضيې لېسې مديره افغاني شراف د حکومت د مرستې له يادې لړۍ څخه هرکلی کوي.
هغه وايي، په دې سره به ډېر هغه زده کوونکي بېرته خپلو زده کړو ته ور وګرځي چې وړاندې تر دې د بېوزلۍ له امله له درسونو پاتې وو.
نوموړې وويل: ((موږ به مخکې هر کال هغو بېوزلو زده کوونکو لپاره چنده ټولوله چې د ښوونځي د يونيفورم اخيستو پيسې يې نه درلودې، د حکومت او نړيوال بانک په دې مرستو سره به ياد مشکل حل شي)).
د هغې په وينا، په اوسني وخت کې بايد تر ټولو ډېره د زده کړو پر بهير ډېره پانګونه وشي.
مرسل مزارشريف کې د يوې لېسې زده کوونکې ده. هغه وايي چې پلار يې په ښار کې لاس ګاډی چلوي او يواځې همدومره روپۍ ګټي، چې کور ته ډوډۍ وګټي.
د هغې په خبره، هر کال دې ته حيرانه وي چې د يونيفورم پيسې له کومه کړي او يا هم کتاب او کتابچې اخيستو لپاره پيسې له کوم ځايه پيدا کړي.
مرسل وايي، له بېوزلو زده کوونکو سره د مرستې لړۍ دا کومک کوي چې ورسره د زده کوونکو ظرفيت هم لوړ شي.
د بلخ پوهنې رياست وايي چې دغه ۵۱ ښوونځي يې ستونزو او اړتياوو ته په کتو د رڼې پروسې له لارې انتخاب کړي دي.
Views: 65
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن