په کابل او ولایتونو کې د هوا ککړتیا مخنیوي په موخه څارنه پیل شوې ده

کابل (پژواک، ۱۴ مرغومي ۱۴۰۰): د افغانستان د چاپیریال ساتنې اداره وایي چې له دې وروسته به هر ورځ د هېواد په مرکز او ولایتونو کې د هوا له ککړوونکو سرچینو څارنه کیږي او له هغو سره به قانوني چلند وشي چې د هوا د ککړتیا لامل ګرځي.

د چاپېريال ساتنې ملي ادارې په خبرپاڼه کې راغلي چې د دغې ادارې د چاپېريالي چارو څارونکو د کابل ښار د هوا ککړتيا د مخنيوي په موخه د شپږمې ناحیې اړوند دوو لوړ پوړيزو ودانيو (انار برج او وکیل پلازا) د سون له سیسټم څخه څارنه وکړه.

سرچینې لیکلي، د دواړو ودانيو مالکينو ته د مفتشينو له خوا لازمې لارښوونې وشوې او د وکيل پلازا له خاوند څخه ليکلې ژمنه واخيستل شوه، ترڅو د سون سیسټم د دود د تصفیې فلټر ترمیم کړي.

سرچینه زیاتوي چې د دې ادارې د چاپېريالي چارو مفتيشين به له دې وروسته هره ورځ په کابل ښار او ولایتونو کې د هوا له ککړوونکو سرچينو څخه څارنه کوي.

په خبرپاڼه کې راغلي، له هغو کسانو سره به قانوني چلند کیږي چې د هوا ککړتيا لامل ګرځي.