امریکا: که طالبان د نجونو ټول ښوونځي پرانیزي، چمتو یو ښوونکو ته یې معاشونه ورکړو

کابل (پژواک، د سلواغې لومړۍ نېټه ۱۴۰۰): د افغانستان لپاره د امریکا ځانګړي استازي توماس ویسټ ویلي، که په افغانستان کې د نجونو ټول ښوونځي پرانيستل شي، نړۍ او هېواد یې چمتو دي ښوونکو ته یې معاشونه ورکړي.

د افغانستان لپاره د امریکا ځانګړي استازي توماس ویسټ دغه څرګندونې له بي بي سي سره په مرکه کې کړې او ویلي یې دي چې د افغانستان د اوسني حکومت پر رسمیت پېژندلو لپاره اوس مهالوېش نه لري، خو غواړي له طالبانو سره د اړیکو له عادي کولو مخکې د طالبانو له لوري ځیني اقدامات وویني.

ویسټ زیاته کړې: ''موږ له طالبانو سره په بېلابېلو بحثونو کې ویلي چې د حالاتو له عادي کولو مخکې باید موږ د طالبانو ځیني ګامونه ووینو؛ د بېلګې په توګه که په کابل کې بېرته خپل سفارت پرانیزو او یا له نړیوالو مالي بنسټونو سره د افغانستان د اړیکو د بېرته عادي کېدو لپاره، زه نه غواړم زموږ د تمو او هیلو پر اوږده لېست دلته خبرې وکړم، خو فقط غواړم یوه غوښتنه له طالبانو دلته یاده کړم او دا یوازې د امریکا غوښتنه نه، بلکې د نړیوالې ټولنې او د سیمې هم ده... په مارچ میاشت کې د نجونو د ښوونځیو پرانیستل، موږ غواړو په مارچ کې د نجونو لپاره د هرې کچې ښوونځي پرانیستل شي، لېسې او دولتي پوهنتونونه ټول... زموږ په ګومان زده کړې د ښځو بنسټیز حق دی، دا او ډېر نور د طالبانو لپاره مهم ازمایښتونه دي چې نړۍ یې څاري، موږ او نړیواله ټولنه دې ته هم چمتو یو چې که طالبان د نجونو ټول ښوونځي پرانیزي، په ټول هېواد کې ښوونکو ته یې معاشونه ورکړو."

هغه د دې پوښتنې په ځواب کې چې امریکا به څه وخت د افغانستان اوسنی حکومت پر رسمیت وپېژني؟ ویلي: "خبره د جنتري نه ده؛ دا داسې څه نه دي چې موږ یې په ذهن کې مهالوېش جوړ کړی وي، دا هر څه د طالبانو له کړنو سره تړلي دي، له خپل هېواد سره یې پر ښکېلتیا پورې اړه لري او دا چې په ډاګه کړي د مسوول حکومت په ډول چلند کوي، له موږ او زموږ له ملګرو سره پر ډيپلوماسۍ پورې اړه نه لري، نو د دې پروسې لپاره مهالوېش نه جوړوو."

وروسته له هغه چې د افغانستان پخوانی حکومت ړنګ شو او ځای یې اوسني سرپرست حکومت ونیو، د دولتي پوهنتونونو او تر شپږم ټولګي د نجونو د لوړو ټولګیو د زده کړو بهیر ودرېد، خو افغان چارواکو ویلي چې په نوي ښوونیز کال کې به د نجونو ټول ښوونځي او پوهنتونونه هم فعالیت پیل کړي.

د افغانستان اوسنی حکومت چې له جوړښته یې شاوخوا پنځه میاشتې تېریږي، تر اوسه کوم هېواد پر رسمیت نه دی پېژندلی، خو د یو شمېر هېوادونو سفارتونه په کابل کې فعالیت کوي او د افغانستان د بهرنیو چارو وزارت نن وویل چې اروپایي ټولنې هم په کابل کې خپل سفارت پرانیست.