ننګرهار کې له راجسټر کېدو پرته د سیمکارتونو پلور خلک اندېښمن کړي

جلال اباد (پژواک، ۲۷ سلواغه ۱۴۰۰): د ننګرهار مرکز جلال‌اباد ښار کې اوس هم غیر راجستر سیمکارتونه په ښکاره پلورل کېږي چې دغه کار عام خلک اندېښمن کړي دي.

د خلکو په خبره، که څه هم د مخابراتو وزارت د غیر راجستر سیمکارتونو پلورل منع کړي، خو لا هم د جلال اباد ښار په ډېرو برخو کې د یو شمېر خصوصي مخابراتي شبکو سیمکارټونه په ازاد ډول پلورل کېږي.

د جلال اباد ښار یوه اوسېدونکي محمد فهیم پژواک اژانس ته وویل چې نا راجستر شوي سیمکارټونه د خلکو د ځورولو، تهدید او ان په ځینو مواردو کې د اختطاف لپاره هم کارول کېږي.

محمد فهیم زیاتوي: ((زه د ننګرهار د یوه اوسېدونکي په توګه د دغو ناثبت سیمکارټونو بندېدو غوښتنه کوم، ډېر کله په کورنیو کې ترې تاوتریخوالی هم پیدا کېږي او همدارنګه زیاتره خلک له همدې لارې ځیني سرمایداره خلک ګواښي.))

عام وګړي له حکومته غواړي چې د ناراجسټر شوو سیمکارټونو مخنیوی وکړي او د ثبت په برخه کې دې یې اسانتیاوې رامنځته کړي.

د جلال اباد ښار يوه بل اوسېدونکي شاه محمد وویل، تمه لري چې د سیمکارټونو په راجستر سره به تر ډېره د جنایي او نورو ترهګریزو پېښو مخنیوی وشي.

د نوموړي په خبره، ډېر کله د غیر راجستر سیمکارټونو په وسیله خلک ځورول کېږي، ګواښل کېږي او ان په ځينو مواردو کې غیر اخلاقي خبرې ورته کېږي.

په ورته مهال د مخابراتو وزارت ویاند عنایت الله الکوزي پژواک اژانس ته وویل، تېره اوونۍ د کابینې په غونډه کې د مخابراتو او معلوماتي ټکنالوجۍ وزارت د سیمکارټونو د ثبت او بایومټریک طرحه تایید کړې ده.

نوموړی وایي، په ياده ناسته کې د مخابراتو او معلوماتي ټکنالوجۍ وزارت ته سپارښتنه وشوه چې د احصايې او معلوماتو له ملي ادارې سره په همکارۍ، یوه طرحه چمتو کړي چې له مخې یې، د سیمکارټونو ثبت او راجستر په تدریجي توګه پيل شي.

عنایت الله الکوزي زیاته کړه: ((د مخابراتو او معلوماتي ټکنالوجۍ وزارت له دې وړاندې هم په دې هڅه کې و چې غیر راجسټر سیمکارټونه ثبت کړي او په دې برخه کې جدي کار هم روان و چې د دې طرحې په عملي کېدو سره به تر ډېره د جنایي جرمونو مخنیوی هم وشي او همدارنګه خلکو ته به اسانتیاوې هم برابرې شي.))

د نظر خاوندان ټینګار کوي چې حکومت باید له هرې ممکنې لارې د غیر قانوني سیمکارټونو د خرڅلاو او کارولو مخه ونیسي څو په ناسمو او غیر قانوني کړنو کې ترې استفاده ونه‌ شي.