کابل (پژواک، ۱۲ کب ۱۴۰۰): د افغانستان کرکټ ملي لوبډلې بنګله دېش ته په دويمه شل اوریزه سیالۍ کې د اتو وېکټو په توپیر سره ماته ورکړه.
د دې لوبې پچه بنګله دېش وګټله، لومړی یې توپوهنه وکړه او په ټاکلو شلو اورونو کې د نهه لوبغاړو په سوځېدو سره يې ۱۱۵ منډې جوړې کړې او د افغانستان لپاره یې د ۱۱۶ منډو هدف وټاکه.
د بنګله دېش له لوري مشفق الرحیم ۳۰ او محمد الله بیا ۲۱ منډې جوړې کړې.
د افغانستان له لوري بیا په توپ اچونه کې فضل الحق فاروقي او عظمت الله عمرزي درې درې، راشد خان او محمد نبي بیا د بنګله دېش یو یو لوبغاړي وسوځول.
افغانستان په دويم وار کولو سره د دوو لوبغاړو په سوځېدو سره یاد هدف په ۱۷.۴ اور کې پوره کړ او بنګله دېش ته یې په اتو وېکټو ماتې ورکړه.
د افغانستان له لوري حضرت الله ځاځي ۵۹ منډې او عثمان غني بیا ۴۷ منډې جوړې کړې.
د یادونې ده، په تېره شل اوریزه سیالۍ کې بنګله دېش افغانستان ته د ۶۱ منډو په توپیر ماته ورکړې وه.
Views: 20
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن