جلال اباد (پژواک، ۲۵ وری ۱۴۰۱): چارواکي وايي، پاکستاني لوري سره د افغان مسوولینو د ناستې په پایله کې هغې غاړې ته د ایسارو افغانانو لومړۍ ډله هېواد ته راستنه شوه.
د دوی په وینا، دغو افغانانو پاسپورټونه نه لرل او غوښتل يې په تذکرو دې غاړې ته راشي؛ خو د پاکستان حکومت دا پروسه تېره اوونۍ بنده کړې وه او د دوی په ګډون سلګونه کسان هغې غاړې ته بند پاتې وو.
د تورخم کمیسار سید غازي الله هاشمي ته د پاکستاني مسوولینو له لوري د ورکړل شويو اسنادو له مخې نږدې پنځوس کسان پرون (چارشنبه) له تورخم دروازې راتېر او هېواد ته راستانه شوي دي.
د تورخم کميساري وايي، دا د هغو شاوخوا پنځو زرو کسانو لومړۍ ډله ده چې په پاکستان کې بند پاتې وو.
بل لورته راستانه شوي کسان خوښ دي او وايي چې دا ستونزه بايد د تل لپاره حل شي.
د دوی له ډلې عبدالباسط پژواک اژانس ته وويل چې هلته د بند پاتې کېدو له امله يې دلته کورنۍ بې سرپرسته وه او خپله هم له ډېرو ستونزو سره مخ و.
ده ټينګار وکړ چې افغان چارواکي بايد دا ستونزه د تل لپاره له پاکستاني لوري سره حل کړي.
د پاکستاني چارواکو له خوا افغان مسوولینو ته ویل شوي چې پاتې نور افغانان به هم ډېر ژر اجازه لیک ترلاسه او افغانستان ته به ستانه شي.
Views: 278
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن