کابل (پژواک، ۱۷ زمری ۱۴۰۱): د کورنيو چارو سرپرست وزير خليفه سراجالدين حقاني وایي، د بنسټيزو پروژو ساتنه او پالنه افغانستان د ځان بسياينې پر لور بيايي.
د کورنیو چارو وزارت له خوا په خپره شوې یوه خبرپاڼه کې راغلي چې خلیفه حقاني دا څرګندونې هلمند ولایت ته د سفر په ترڅ کې د کجکي برېښنا له بنده د ليدنې پر مهال کړې دي.
سرچینې زیاته کړې، سرپرست وزیر د دې لیدنې پر مهال امنيتي مسوولينو ته جدي سپارښتنه وکړه چې په ټول توان د دې بنسټیزې پروژې ساتنه وکړي.
په خبرپاڼه کې راغلي، نوموړي د کجکي بند له تخنيکي مسوولينو او انجنيرانو سره هم وليدل؛ د هغوى د زیار او هڅو ستاينه يې وکړه او ویې وهڅول چې د داسې ټولګټو پروژو په کار کې تر وروستي حده زيار وباسي.
نوموړي په ټينګار سره وويل چې د داسې بنسټيزو پروژو رغول او ساتل د افغانستان اسلامي امارت له لومړيتوبونو دي او باور لري چې پر خپلو پښو درېدو لپاره تر ټولو غوره لار همدا ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن