کابل (پژواک، ۱۱ تله ۱۴۰۱): د لوړو زدهکړو وزارت وايي، د کابل پوهنتون په لیلیه کې تر پنځوسو محصلینو ته په خوړو کې د بېاحتیاطۍ له امله ناروغي پیدا شوې وه چې درملنه یې وشوه، خو د مسموم کېدو اثار په کې نه دي پیدا شوي.
تېره ورځ ځینو رسنیو خبر خپور کړی و چې د کابل پوهنتون د نجونو په لیلیه کې یو شمېر نجونې مسمومې شوې دي.
د لوړو زدهکړو وزارت ویاند مولوي احمد تقي نن (د تلې ۱۱مه) پژواک خبري اژانس ته وویل، دا چې ځینو رسنيو خبر ورکړی چې ګواکې د کابل پوهنتون په ليليه کې يو شمېر محصلين مسموم شوي، هیڅ حقيقت نه لري.
دی وايي: «د کابل پوهنتون په ليليه کې ټول ۱۵۰۰ محصلين مېشت دي چې وړمه شپه په خوراک کې د بېاحتیاطۍ له امله تر ۵۰ تنو پوري محصلينو ته ناروغي پېښه شوې وه.»
سرچینې د جزییاتو له ورکولو پرته زیاته کړې چې د پوهنتون د ادارې او د عامې روغتیا وزارت یوه پلاوي له خوا د ناروغانو پر وخت درملنه شوې او د مسموم کېدو هیڅ اثار په کې نه دي پیدا شوي.
GET IN TOUCH
NEWSLETTER
SUGGEST A STORY
PAJHWOK MOBILE APP