هلمند کې د غوړیو تولید دویمه فابریکه هم فعاله شوه

لښکرګاه (پژواک ، ۲۱ لړم ۱۴۰۱): د هلمند د صنعت او سوداګرۍ ټولنې مسوولین وايي، په دغه ولایت کې د دوو ورځو په اوږدو کې د پنبې پروسس او د غوړیو تولید دویمه فابریکه هم فعاله شوه.

د دغه ولایت د صنعت او سوداګرۍ ټولنې رییس غلام یحیی پښتون پژواک خبري اژانس ته وویل، پرون د مرکز لښکرګاه د درېیمې امنیتي حوزې په بولان سیمه کې د پنبې د پروسس او د غوړیو تولید دویمه فابریکه فعاله شوه او د تولید چارې يې پيل کړې.

هغه زیاته کړه، اوس د دغه ولایت صنعت د ودې په حال کې دی او په دې برخه کې سوداګرو پانګونه ډېره کړې ده.

په لښکرګاه کې د دغه نوې فعالې شوې فابريکې مالک حاجي ملا عبدالجبار پژواک اژانس ته وویل: «د ۴۰ میلیون افغانیو په لګښت مې د پنبې د پروسس او غوړیو د تولید نوې فابريکه جوړه او فعاله کړه.»

ده زیاته کړه، فابریکه يې په یوه ساعت کې د پنځه ټنه پنبې د پروسس او د غوړیو، مالوچ، کنجاړې او صابون د تولید وړتیا لري.

د یادونې ده چې د لړم په ۱۸مه هم د یاد ولايت په مرکز لښکرګاه کې د ۷۲ میلیون افغانیو په ارزښت د پنبې د پروسس او د غوړیو تولید یوه فابريکه جوړه شوه او ۱۰۰ کسانو ته پکې د کار زمینه برابره شوې ده.