د بلخ پولیس په دغه ولایت کې د یوه مشهور غله له وژل کېدو خبر ورکوي

مزارشريف (پژواک، ٦ لېندۍ ١۴٠١): د بلخ امنيه قومانداني وايي، په دغه ولايت کې «مشهور غل او اختطاف‌کوونکی» احسان له امنيتي ځواکونو سره په نښته کې وژل شوى دى.

دغه څرګندونې په هغې خبرپاڼې کې شوې چې د بلخ د امنيې قوماندانۍ له لوري پژواک خبري اژانس ته رالېږل شوې ده.

سرچينه وايي چې تېره شپه ١١:٣٠ بجې «مشهور غل او اختطاف‌کوونکى» احسان د اوومې امنيتي حوزې له ځواکونو سره په نښته کې وژل شوى دى.

په خبرپاڼه کې راغلي چې احسان د ولسي جرګې پخواني غړي اسدالله شريفي له نږدې کسانو او قوماندانانو څخه و.

سرچينه زياتوي چې د بلخ ولايت مشهور ډاکټر اسدالله شارق هم د احسان له لوري وژل شوى و.

د يادونې ده چې شاوخوا يوه نيمه مياشت وړاندې په بلخ کې مشهور ډاکټر اسدالله شارق له تښتولو وروسته ووژل شو.