<p style="text-align: justify;">مزارشريف (پژواک، ٦ لېندۍ ١۴٠١): د بلخ امنيه قومانداني وايي، په دغه ولايت کې «مشهور غل او اختطافکوونکی» احسان له امنيتي ځواکونو سره په نښته کې وژل شوى دى.</p>
<p style="text-align: justify;">دغه څرګندونې په هغې خبرپاڼې کې شوې چې د بلخ د امنيې قوماندانۍ له لوري پژواک خبري اژانس ته رالېږل شوې ده.</p>
<p style="text-align: justify;">سرچينه وايي چې تېره شپه ١١:٣٠ بجې «مشهور غل او اختطافکوونکى» احسان د اوومې امنيتي حوزې له ځواکونو سره په نښته کې وژل شوى دى.</p>
<p style="text-align: justify;">په خبرپاڼه کې راغلي چې احسان د ولسي جرګې پخواني غړي اسدالله شريفي له نږدې کسانو او قوماندانانو څخه و.</p>
<p style="text-align: justify;">سرچينه زياتوي چې د بلخ ولايت مشهور ډاکټر اسدالله شارق هم د احسان له لوري وژل شوى و.</p>
<p style="text-align: justify;">د يادونې ده چې شاوخوا يوه نيمه مياشت وړاندې په بلخ کې مشهور ډاکټر اسدالله شارق له تښتولو وروسته ووژل شو.</p>
