[restrict paid=”true”]
اټلانټا (پژواک، ۱۴ سلواغه ۱۴۰۱): په ملګرو ملتونو کې د پاکستان استازي د افغان نجونو زدهکړو په اړه د خپلو څرګندونو له امله بښنه غوښتې او په ډاګه کړې یې ده چې زدهکړو ته د ښځو او نجونو مخنیوی نه اسلامي توجیه لري او نه هم د پښتني کلتور برخه ده.
منیر اکرم دوه ورځې مخکې د ملګرو ملتونو یوې غونډې ته په خپله وینا کې ویلي وو: «زموږ له نظره د نجونو زدهکړو په اړه هغه بندیزونه چې د افغانستان سرپرست حکومت له لوري لګول شوي، تر ډېره د پښتنو له کلتوري برخې سرچینه اخلي، نه له مذهبه؛ د همدغه کلتور له مخې ښځې باید په کورونو کې وساتل شي.»
هغه ادعا کړې چې دغه کلتور په تېرو سلو کلونو کې نه دی بدل شوی.
د پاکستاني استازي دغه څرګندونې په لر او بر کې د یو شمېر خلکو، په ځانګړې توګه د افغانانو سخت غبرګونونه راوپارول.
د خلکو له سختو غبرګونونو وروسته په ملګرو ملتونو کې د پاکستان استازي منیر اکرم د نجونو زدهکړو په اړه د خپلو څرګندونو له امله بښنه غوښتې ده.
هغه په یوه ټویټ کې ویلي، خبرې یې سمې نه وې او ده د پاکستان دریځ منعکس نه شو کړای.
My apologies for the hurt caused by my comments at the humanitarian briefing on Afghanistan.I mispoke & my words did not accurately reflect Pakistan’s position.I have deep respect for Pashtun culture.Denying women & girls access to education is neither Islamic,nor Pashtun culture
— Munir Akram, PR of Pakistan to the UN (@PakistanPR_UN) February 3, 2023
منیر اکرم زیاته کړې: «زه پښتني کلتور ته ژور درناوی لرم، زدهکړو ته د ښځو او نجونو د لاسرسي مخنیوی نه اسلامي دی او نه هم پښتني کلتور.»
د نوموړي یادو څرګندونو په ځواب کې په ملګرو ملتونو کې د افغانستان استازي نصیراحمد فایق ویلي وو: «د طالبانو کړنې د افغانستان د خلکو له هیڅ کلتور سره اړخ نه لګوي.»
د یادونې ده، فایق د تېر جمهوري نظام پر مهال هلته پاتې دی او ملګرو ملتونو د اوسني سرپرست حکومت استازی نه دی منلی.
دغه راز د پښتون ژغورنې غورځنګ مشر منظور پښتین ویلي، پر ښځو تعلیم نه کول د پښتنو رواج نه دی او د منیر اکرم څرګندونو دا په ډاګه کړه چې د افغان نجونو پر وړاندې د ښوونځیو تړلو پرېکړې تر شا د چا لاس دی.
[/restrict]
Views: 202
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن