بدخشان کې د سختې واورې ورېدو له امله د لسو ولسوالیو لارې د ولایت له مرکز سره تړل شوې دي

فیض‌اباد (پژواک، ۲۱ سلواغه ۱۴۰۱): د بدخشان په مرکز او ځینو ولسوالیو کې له تېرې شپې راهیسې د واورې ورېدو له امله، د لسو ولسوالیو لارې د دغه ولایت له مرکز سره تړل شوې دي.

د راپورونو له مخې، د راغستان، کوهستان، یاوان، نسي، شکي، مایمي، کوف اب، خواهان، واخان او شغنان ولسوالیو لارې د بدخشان له مرکز سره تړل شوې دي.

د یو شمېر ولسوالیو اوسېدونکو له پژواک اژانس سره په ټېلیفوني اړیکه کې وویل چې د سختې واورې ورېدو او پرله‌پسې برف کوچونو له امله له مرکز سره د دوی د ولسوالیو لارې بندې شوې دي.

د راغستان ولسوالۍ یوه اوسېدونکي احمد ولي له ځايي مسوولینو وغوښتل چې د دغو لارو خلاصولو برخه کې اقدام وکړي.

login or register a new account.