لغمان کې د پرون شپې اورښت او ږلۍ مالي زیانونه اړولي

مهترلام (پژواک، ۱ وری ۱۴۰۲): د لغمان له پېښو سره د مبارزې او چمتووالي ریاست وايي، د دغه ولایت په مرکز مهترلام او الېشنګ ولسوالۍ کې سخت اورښت او ږلۍ خلکو ته مالي زیانونه اړولي دي.

د دغې ادارې رییس قاري خیرمحمد غازي پژواک خبري اژانس ته وویل، هغه معلومات چې دوی له مرکز مهترلام او الیشنګ ولسوالیو تر لاسه کړي، ښيي چې د تېرې شپې اورښت او ږلۍ ۷۰۰ جریبه بېلابېلې کروندې له منځه وړې دي.

هغه زیاته کړه، دغه‌راز په مرکز او یاده شوې ولسوالۍ کې د استوګنې ۲۵ کورونه هم نړېدلي، له ۱۰۰ ډېرې د لمریزې برېښنا هیندارې ماتې شوې او د باغونو لسګونه مېوه لرونکي ونې چپه شوې دي.

د مرکز مهترلام د محمد خېلو سیمې یوه اوسېدونکي عبدالمجید پژواک اژانس ته وویل، پرون شپه دلته شدیده ږلۍ و اورېده چې خلکو ته یې درانه مالي زیانونه واړول.

login or register a new account.