د ننګرهار ملکي هوايي ډګر ترمينل پرانيستل شو

<p style="text-align: justify;">جلال‌اباد (پژواک، ۷ غبرګولی ۱۴۰۲): د ننګرهار ولايت په ملکي هوايي ډګر کې د مسافرو لپاره ترمينل جوړ او ګټې اخیستنې ته وسپارل شو.</p>

<p style="text-align: justify;">که څه هم تر اوسه له دغه هوايي ډګره سوداګريزې الوتنې نه دي پيل شوې، خو مسوولين وايي، له هوايي شرکتونو سره يې په دې اړه خبرې روانې دي.</p>

<p style="text-align: justify;">د ننګرهار ولايت مقام مطبوعاتي دفتر د غبرګولي په ۷مه د خبرپاڼې په خپرولو ويلي چې د دغه ولايت د مرستیال والي مولوي محمدرباني ناصح په لاس د ملکي هوايي ډګر ترمينل چې پر ټولو اړينو وسايلو او خدماتو سمبال دی، پرانیستل شو.</p>

<p style="text-align: justify;">په خبرپاڼه کې د مرستيال والي له قوله راغلي، د ننګرهار ولايت ملکي هوايي ډګر په بشپړ ډول الوتنو ته چمتو دی.</p>

<p style="text-align: justify;">نوموړي د ملکي هوايي ډګر د چارو لا ښه والي، ملکي الوتنو ته د زمينې برابرېدو او نورو برخو کې د همکارۍ ډاډ څرګند کړى او په يو شمېر برخو کې یې د هوايي ډګر مسوولينو ته سپارښتنې هم کړې دي.</p>

<p style="text-align: justify;">د ننګرهار ملکي هوايي ډګر امر رحمت‌الله شجاع وايي، ملکي هوايي ډګر يې واک ته د اسلامي امارت له رسېدو وروسته فعال کړی چې تر دې دمه ورته مرستندويه ادارو شاوخوا څلور سوه الوتنې او دوه نيم زره مسافرينو ترې سفرونه کړي.</p>

<p style="text-align: justify;">نوموړي وويل، د ملکي هوايي ډګر ترمينل يې پر ټولو اړينو وسایلو او خدماتو سمبال کړی او کولی شي چې مسافرو ته په ښه ډول خدمات وړاندې کړي.</p>

<p style="text-align: justify;">هغه پر مرکزي ادارې او هوايي شرکتونو غږ وکړ چې ننګرهار ته الوتنې پيل کړي، څو د ختيځ زون وګړي وکولای شي په الوتکو کې سفرونه وکړي.</p>

<p style="text-align: justify;">د ولايت مقام په خبرپاڼه کې د دغه ترمينل جوړولو د لګښت په اړه څه نه دي ویل شوي، خو د چارو د پيل پر مهال يې مسوولينو ويلي وو چې له شته امکاناتو به کار اخلي.</p>

<p style="text-align: justify;">د ننګرهار هوايي ډګر په تېرو شلو کلونو کې په هېواد کې د مېشتو ناټو او امريکايي ځواکونو لويه اډه وه چې ملکي الوتنې ترې نه ترسره کېدې.</p>