کابل (پژواک، ۲۱ غبرګولی ۱۴۰۲): د اسلامي امارت ویاند ذبیحالله مجاهد د افغانستان په اړه د ملګرو ملتونو امنیت شورا وروستي راپور په اړه وایي چې دا ډول راپورونه له تعصبه ډک او د خپلواکۍ او عدم مداخلې له اصولو سره په ټکر کې دي او باید د پای ټکی ورته کېښودل شي.
د ملګرو ملتونو امنیت شورا د تعزیراتو کمېټې د تحلیل او نظارت ټيم په خپل څوارلسم راپور کې – چې تېره ورځ خپور شوی – ادعا شوې چې په افغانستان کې د ترهګرو ډلو فعالیت ډېر شوی، القاعدې بیا سر راپورته کړی او د داعش بریدونه هم زیات شوي دي.
په راپور کې راغلي چې د افغانستان سرپرست حکومت ۵۸ چارواکي د دې شورا د بندیزونو لېست کې دي او طالبان د ۹۰یمې لسیزې په څېر د پښتنو په محوریت استبدادي پالیسو ته ستانه شوي او په لنډه موده کې د بدلون لپاره کومه هیله هم نشته.
سرچینه ادعا کوي چې اسلامي امارت د دوحې تړون نه دی عملي کړی.
د اسلامي امارت ویاند ذبیحالله مجاهد وایي، د ملګرو ملتونو امنیت شورا دغه راپور یو اړخیز، غیرمتوازن او له واقعیته لرې راپور دی.
هغه د دغه راپور په اړه د افغانستان سرپرست حکومت د دریځ په اړه وایي: «د افغانستان اسلامي امارت د ملګرو ملتونو امنیت شورا د تعزیراتو دوام او دا ډول راپورونه یې له تعصبه ډک او د خپلواکۍ او عدم مداخلې له اصولو سره په ټکر کې بولي او غوښتنه کوي چې باید د پای ټکی ورته کېښودل شي.»
هغه زیاتوي: «د افغانستان اسلامي امارت په یاد راپور کې منعکس شوي بېاساسه تورونه چې د افغان حکومت د مشرانو ترمنځ اختلافات موجود دي، افغانستان د ترهګرو پر امنځای بدل شوی، د مخدره توکو قاچاق د اسلامي امارت د چارواکو له خوا کېږي، د صلاحیتونو انحصار او په حکومت کې د ټولو قومونو نهشتون او نور …. بېبنیاده او د افغانستان له خپلواک ولس او نظام سره ښکاره دښمني او د تېرو شلو کالو بېاساسه تبلیغاتو بې ګټې او مغرضانه تکرار بولي.»
مجاهد د دغه راپور ارزونه چې د افغانستان سرپرست حکومت د ګاونډيو او سیمې هېوادونو له مخالفینو سره مرسته کوي یا د افغانستان خاوره د نورو هېوادونو خلاف استعمالوي، په کلکه ردوي او وایي: «د دغه راپور له محتوا څخه ښکاري چې یا خو یې ليکونکي معلوماتو ته لاسرسی نه لري، یا قصداً حقایق تحريفوي او یا یې هم د معلوماتو سرچیني د اسلامي امارت تښتېدلي مخالفین دي.»
هغه وایي، د افغانستان اسلامي امارت ټینګار کوي چې خپلو ژمنو ته متعهد دی او د دې ډاډ ورکوي چې د افغانستان له خاورې ګاونډیو، د سیمې او نړۍ هېوادونو ته هيڅ ډول ګواښ متوجه نه دی او افغانستان هیچا ته د دې اجازه نه ورکوي چې خاوره يې د نورو خلاف استعمال شي.
ذبیحالله مجاهد زیاتوي: «د اسلامي امارت شاوخوا دوو کلونو واکمنۍ زموږ دغه ادعا ثابته کړې ده چې په پايله کې يې د ګاونډيو او سيمې له مهمو هېوادونو سره د افغان حکومت اړيکې ورځ تر بلې پراخېږي او د مشترکو ګټو پر بنسټ يې ښه پرمختګ کړی، دا د دوه اړخيز اعتماد پايله ده.»
مجاهد دغه راز زیاتوي، د نشهيي توکو کښت، تولید او قاچاق په بېساري ډول راکښته شوی او د نړۍوالو رسنیو وروستي راپورونه د دې ښکاره ثبوت دی.
هغه وایي، د امنیت شورا دا ډول یو اړخیز او غیرموثق راپورونو نشر نه یوازې دا چې د افغانستان او نړۍوالې سولې او امنیت برخه کې مرسته نه کوي؛ بلکې د خلکو اندېښنو ډېرېدو سبب ګرځي او د ملګرو ملتونو پر خپلواکۍ او بېپريتوب شکونه لا زياتوي او اعتبار ته يې هم صدمه رسوي.
مجاهد زیاتوي چې د اسلامي امارت ټولې پرېکړې د اسلامي شریعت د لارښوونو، دوو اړخيزو او څو اړخيزو تعهداتو او ملي ګټو په رڼا کې ترسره کېږي او چمتو دی چې له نړۍوالي ټولنې سره ګډو اندېښنو ته د رسېدو په موخه تعامل ته دوام ورکړي.
Views: 70
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن