جلالاباد (پژواک، ۹ وږی ۱۴۰۲): د افغانستان د خپلواکو ژورنالیستانو اتحاديه وايي چې په ننګرهار، کندهار او کندوز ولايتونو کې څلور خبريالان له بنده ازاد شوي دي.
د افغانستان د خپلواکو ژورنالیستانو اتحاديې نن د (وږي ۹مه) د يوې اعلامیې په خپرولو سره ويلي، په ننګرهار کې د کلید راډيو سيمهییز مسوول فقيرمحمد فقیرزی او د دې راډیو خبريال جان اغا صالح له شل ورځني بند تېرولو وروسته نن ازاد شول.
دې اتحادیې د کلید ګروپ د دغو دوو ژورنالیستانو د راخوشي کولو هرکلی کړی او ټينګار یې کړی چې د رسنيو اړوندې قضیې باید د رسنیزو سرغړونو کمېسیون له لارې حل شي.
بلخوا د افغانستان د خپلواکو ژورنالیستانو اتحاديې دا هم ويلي چې په کندهار کې د طلوع نيوز خبريال عطالله عمر او کندوز کې د سلام وطندار راډيو خبريال حسيب حساس هم له بنده ازاد شوي دي.
دغه راز د افغانستان د خبريالانو مرکز هم د يوې اعلاميي په خپرولو سره د يادو کسانو د خلاصون هرکلى کړى او ټينګار یې کړى چې له ځنډ پرته هغه خبريالان چې دا مهال په بند کې دي، هم بايد ازاد شي.
د ننګرهار د اطلاعاتو او فرهنګ رياست د مطبوعاتو آمر صديقالله قريشي بدلون هم پژواک ته د فقيرزي او صالح د خلاصون خبر تاييد کړ.
نوموړي ټيڼګار وکړ: «د هغو رسنیو ملاتړ ته ژمن یو چې اسلامي مقرراتو او ملي ګټو ته ژمن وي.»
فقیرزی او صالح د زمري په ۲۰مه په جلالاباد ښار کې له خپل دفتر څخه د استخباراتو رياست له خوا ونيول شول چې مسوولينو يې د نيول کېدو لاملونه د نظام ضد له رسنيو سره همکاري او ورسره د معلوماتو شریکول په ګوته کړي وو.
Views: 111
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن