فاریاب او جوزجان کې د دوو ترافیکو پېښو له امله دوه کسان مړه شوي او یو بل ټپي دی

شبرغان، میمنه (پژواک، ۱۲ تله ۱۴۰۲): ځايي مسوولین وايي چې د مزارشریف – شبرغان پر لویه لار او د فاریاب په مرکز میمنې ښار کې په دوو جلا ترافیکي پېښو کې دوه کسان مړه شوي او یو بل ټپی شوی دی.

د جوزجان د امنیې قوماندانۍ ویاند قاري عبدالستار حلیمي پژواک خبري اژانس ته وویل چې نن سهار شاوخوا ۷:۳۰ بجې د شبرغان ښار اړوند په «چیغچي» سیمه کې یو سراچه موټر له کاماز ډوله موټر سره ټکر کړی.

هغه زیاته کړه چې په دغه ترافیکي پېښه کې یو کس مړ او یو بل ټپي شوی دی.

هغه وویل چې د پېښې ټپي د جوزجان ولایتي روغتون ته لېږدول شوی دی.

نوموړی وايي، د کاماز موټرچلوونکی د پېښې له ځایه تښتېدلی او امنیتي ځواکونو یې د نیولو هڅې پیل کړې دي.

دا په داسې حال کې ده چې تېر ماښام هم د شبرغان – مرازشریف پر لویه لار د یوې بلې ترافیکي پېښې له امله دوه کسان مړه او یو بل ټپي شوی و.

بل‌‌خوا، فاریاب کې سرچینې وايي چې د میمنې ښار د لومړۍ ناحیې په دمقول ګذر کې په یوه ترافیکي پېښه کې د دغه ولایت د پوهنتون یو محصل مړ شوی دی.

د فاریاب د امنیې قوماندانۍ مطبوعاتي دفتر پژواک خبري اژانس ته وویل، د بندر ولسوالۍ اصلي اوسېدونکی سیداحمد شاه چې اوس د میمنې ښار د لومړۍ ناحیې د دمقول ګذر اړوند سیمه کې اوسېده، په یوه ترافیکي پېښه کې مړ شوی دی.

سرچینې زیاته کړه، سیداحمد شاه چې پر بایسکل سپور و او غوښتل کې د عمومي سړک بلې غاړې ته واوړي، د یوه خاور ډوله موټر له خوا وهل شوی چې موټرچلوونکی نیول شوی دی.

د فاریاب د ښوونې او روزنې پوهنتون رییس سید بهاوالدین هاشمي وايي چې سیداحمد شاه د هغه د تره زوی او د شرعیاتو د دویم ټولګي محصل و.