قطر او ملګرو ملتونو د افغانستان بشري وضعیت، تلپاتې سولې او امنیت په اړه خبرې کړې

[restrict paid="true"]

اټلانټا (پژواک، ۳۰ سلواغه ۱۴۰۲): د قطر د بهرنیو چارو وزیر د ملګرو ملتونو له سرمنشي سره د افغانستان پر بشري وضعیت او هلته د تلپاتې سولې او امنیت په اړه خبرې کړې دي.

د قطر دولتي اژانس (قنا) د سلواغې په ۳۰مه، خبر ورکړی چې د ملګرو ملتونو سرمنشي انتوني ګوتریش نن په دوحه کې د دغه هېواد لومړي وزیر او د بهرنیو چارو وزیر شیخ محمد بن عبدالرحمن الثاني سره ولیدل.

سرچینې زیاته کړې چې په دې لیدنه کې د افغانستان پر وروستیو حالاتو، د دوحې کنفرانس او د غزې پر حالت باندې خبرې وشوې.

د افغانستان په تړاو د دوحې ناسته چې د ملګرو ملتونو د سرمنشي په سرپرستۍ پرون جوړه شوې وه، نن پای ته ورسېده.

سرچینې زیاته کړې چې په دې لیدنه کې دواړو لورو د افغانستان پر بشري وضعیت او هلته پر تلپاتې سولې او امنیت باندې هم خبرې وکړې.

د قطر د بهرنیو چارو وزیر په غزه کې پر اوربند د ټینګار ترڅنګ وویل چې هېواد یې په دې برخه کې د ملګرو ملتونو له ټولو هڅو ملاتړ کوي.

دغه راز هغه زیاته کړه، هېواد یې په هره برخه کې د افغانستان د خلکو ملاتړ ته ادامه ورکوي او د ملګرو ملتونو د هغو هڅو ملاتړ هم کوي چې افغانستان کې د دایمې سولې او امنیت لپاره یې کوي.

د ملګرو ملتونو سرمنشي په افغانستان او غزه کې د شخړو د هواري لپاره د قطر د هلو ځلو او ملاتړ ستاینه وکړه.

[/restrict]