<p style="text-align: justify;">کابل (پژواک، ۱۳ کب ۱۴۰۴): د افغانستان د ملي دفاع وزارت وایي، د افغان ځواکونو په انتقامي بریدونو کې ۱۵۰ پاکستاني عسکر وژل شوي، له ۲۰۰ ډېر ټپيان شوي او شاوخوا ۴۰ پوستې یې فتح شوې دي.</p>
<p style="text-align: justify;">د ملي دفاع وزارت ویاند عنایتالله خوارزمي نن په کابل کې یوې خبري ناسته کې وویل چې له پاکستان سره د جګړې له پیله راهیسې ۲۸ افغان ځواکونه شهیدان او ۴۲ نور ټپيان شوي دي.</p>
<p style="text-align: justify;">هغه ټینګار وکړ چې اسلامي امارت له هېواده د دفاع مشروع حق لري.</p>
<p style="text-align: justify;">خوارزمي دغه راز زیاته کړه چې په تېرو ۲۴ ساعتونو کې د ردالظلم عملیاتو پر مهال پر پاکستاني ملېشو درانه ځوابي بریدونه شوي دي.</p>
<p style="text-align: justify;">د هغه د معلوماتو له مخې، په تېرو ٢٤ ساعتونو کې د فرضې کرښې په اوږدو کې ٢٥ ځلې جکړه شوې چې تعرضي او دفاعي عملیات پکې شامل دي.</p>
<p style="text-align: justify;">د دفاع وزارت د ویاند د معلوماتو له مخې، په تېرو ۲۴ ساعتونو کې د پاکستان پوځي رژیم ١٣ پوستې تخریب، څلور پاکستاني عسکر وژل شوي او یو شمېر ټپيان دي.</p>
<p style="text-align: justify;">دی وایي، د یادو عملیاتو پر مهال د پاکستاني ځواکونو یو شمېر سپکې او درنې وسلې هم د افغان ځواکونو لاس ته ورغلې دي.</p>
<p style="text-align: justify;">د پاکستان پوځي رژیم د وړمې یکشنبې په شپه (د کب دوېمه) د افغانستان حریم نقض کړ، لومړی یې په ننګرهار او پکتیکا کې پر ملکي سیمو بریدونه وکړل او دغه بریدونه لا هم دوام لري. افغان ځواکونو هم د کب له اتمې راهیسې د پاکستان پر پوځي تاسیساتو بریدونه پيل کړي دي. چارواکي وایي، په دغو بریدونو کې پاکستاني لوري ته درنه مرګژوبله اوښتې ده.</p>
