ایټالیا غواړي په کابل کې د خپل سفارت فعالیتونه پراخه کړي

[restrict paid="true"]

کابل (پژواک، د وري لومړۍ نېټه ۱۴۰۳): د افغانستان لپاره د ایټالیا ځانګړی استازی او د دغه هېواد شارژدافیره وایي، غواړي په کابل کې د خپل سفارت فعالیتونه پراخه کړي.

د بهرنیو چارو وزارت لخوا د وري په لومړۍ نېټه، په یوه خپره شوې خبرپاڼه کې راغلي، افغانستان لپاره د ایټالیا سفارت شارژدافېرې نتالیا کانتیوالا، د ياد هېواد ځانګړي استازي جان فرانکو پیتروزیلا او ورسره مل پلاوي د ا.ا.ا د بهرنیو چارو له وزیر مولوي امیر خان متقي سره وکتل.

سرچینې زیاته کړې، د کتنې په لړ کې دواړو لورو د ملګرو ملتونو په چوکاټ کې د افغانستان په اړه د دوحې د وروستۍ ناستې او راتلونکو ناستو برسېره، له لوېديځو هېوادونو سره د ا.ا.ا د دوه اړخیزو او څو اړخیزو اړیکو د پراختیا او له افغانستان سره د ایټالیا د مرستو په اړه اندونه تبادله کړل.

کوانتیوالا په کابل کې د ایټالیا د سفارت د فعالیتونو پراخولو له هڅو څخه هم يادونه وکړه او زیاته یې کړه، چې د ایټالیا جمهوریت د افغانستان له خلکو سره د بشري مرستو ترڅنګ په اقتصادي برخو کې له نړۍوال بانک او خپلو شريکانو سره کار کوي، ترڅو د افغانستان اقتصادي ثبات لپاره ګټور ثابت شي.

د بهرنیو چارو وزارت سرپرست مولوي امیرخان متقي په دې لیدنه کې وويل،  ا.ا.ا د نړۍ له  ټولو هېوادونو سره متوازنې اړیکې غواړي او د تعامل دروازې يې د ټولو هېوادونو پر مخ خلاصې دي. لوېديځ هېوادونه هم کولای شي، چې د نړۍ د نورو هېوادونو په څېر  د ا.ا.ا سره تعامل ته را وړاندې شي او د افغانستان اړوند مسایل مخامخ مطرح کړي.

ده همداراز زياته کړه، د هر هغه فعالیت هرکلی کوو، چې د افغانستان د خلکو لپاره د هوساينې سبب کيږي.

[/restrict]