پلعلم (پژواک، ۲۹ وری ۱۴۰۳): د لوګر مرکز پلعلم ښار اړوند په شهیدانو تپه کې د دغه ولایت د ولایتي چارواکو او خلکو له لوري د نیالګيو کېنولو عمومي حشر وشو.
د دغه ولایت د کرنې، اوبولګولو او مالدارۍ رییس مولوي سیدامین هاشمي جوړو شوو مراسمو ته وویل، د ولایت مقام، کرنې او مالدارۍ ریاست، پلعلم ښاروالۍ او ولسي وګړو له لوري په شیهدانو تپه کې د َ«زرغون او پرمختللي هېواد» تر عنوان لاندې د نیالګیو کېنولو عمومي حشر وشو.
هغه وايي چې د دغه حشر له لارې شاوخوا درې زره میوه لرونکي او غیرمثمر نیالګي اېښودل کېږي.
هاشمي زیاته کړه، د یاد حشر څخه یې موخه د شهیدانو تپې زرغونول او د سېلابونو مخنیوی دي.
بلخوا د لوګر ولایت مرستیال والي مولوي محمدانور دینپرورو د دغه ولایت له اوسېدونکو مننه وکړه چې له ولایتی ادارې سره یې په ګډه د نیالګیو کېنولو په عمومي حشر کې ونډه واخیسته.
نوموړي زیاته کړه، ولس ته په کار ده چې په خپلو سیمو کې میوهلرونکي او غیر میوهلرونکي نیالګي کېنوي او د نیالګیو په ساتنه او پالنه کې له دولت سره بشپړه همکاري وکړي.
د نیالګیو کېنولو حشر یوه ګډونوال محمدحسن پژواک ته وویل، د پلعلم ښار لسګونو اوسېدونکو په شیهدانو تپه کې د نیالګیو کېنولو په حشر کې ګډون وکړ.
هغه وویل، ولایتي ادارې ته په کار ده چې په مرکز پلعلم او ولسوالیو کې د اېښودل شوو نیالګیو د ساتنې او پالني لپاره په یوه منظم پلان کار وکړي.
د کرنې، اوبولګولو او مالدارۍ ریاست د معلوماتو له مخې له تېر کال راهیسې ولایتي ادارې د دغه ولایت مرکز پلعلم ښار اړوند په «شهیدانو تپه» کې شاوخوا ۱۲ زره میوهلرونکي او غیرمثمر نیالګي کېنولي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن