کابل کې د نقاشۍ او خطاطۍ رقابتي نندارتون جوړ شو

کابل (پژواک، ۲۶ غویی ۱۴۰۲): د یوه فرهنګي بنسټ مسوولین په کابل کې د هنرمندانو د ملاتړ او ستاینې په موخه د ۷۰ نقاشانو او خطاطانو ترمنځ د رقابتي نندارتون له پرانیستلو خبر ورکوي.

دغه رقابت د افغانستان د فرهنګ او هنر کور له لوري د اطلاعات او کلتور وزارت په همکارۍ له درېیو ورځو راهیسې د نړۍوالو نندارتونونو په مرکز کې پیل شوی دی.

د افغانستان د فرهنګ او هنر کور مسوولین وايي چې په یاد رقابت کې له بېلابېلو ولایتونو ۴۵ هلکانو او ۲۵ نجونو ګډون کړی او د جمعې په ورځ د غویي په ۲۸مه به پای ته ورسېږي.

د افغانستان د فرهنګ او هنر کور مدیر مسوول رضا متامن د ورته رقابتونو جوړېدو پر اهمیت د ټینګار ترڅنګ له اسلامي امارته وغوښتل چې له هنرمندانو او کلتوري بنسټونو مادي او معنوي ملاتړ وکړي.

ورته مهال، ځيني ګډونوال نیوکه کوي چې کلتوري برخو ته کمه پاملرنه کېږي، له سرپرست حکومته د ملاتړ او د اسانتیاوو برابرېدو غوښتنه کوي.

نقاش عارف احمدي وویل، په هره اندازه چې کلتوري برخو ته ډېره پاملرنه وشي، ټولنه به ژوندۍ وي او هنرمندان به هم خپل کارونه په لا ډېرې انګېزې سره ترسره کوي.

نقاشې زرغونه اوریاخیل د خپلو مهارتونو ودې لپاره د یادو رقابتونو جوړولو اهمیت ته په اشاره له سرپرست حکومته د هنرمندانو د ملاتړ او په دوامداره توګه د ورته رقابتونو د جوړېدو غوښتونکې شوه.

د ویلو ده، یاد رقابت د نړۍوالو نندارتونونو په مرکز کې د صنعت اونۍ نندارتون په څنډه کې جوړ شوی او د درېیو غوره کسانو لپاره جایزې په پام کې نیول شوې دي.