جلال‌اباد ښار کې د نهه میلیون افغانیو په لګښت د کوڅو پخولو یوه پروژه بشپړه شوه

جلال‌اباد (پژواک، ۱۶ غبرګولی ۱۴۰۳): د ننګرهار په مرکز جلال‌اباد ښار کې د نړۍوال بانک د نهه ميلیون افغانيو په لګښت درې فرعي کوڅې پخې شوې.

دا پروژه چې له بشپړېدو وروسته نن پرانیستل شوه، د جلال‌اباد ښار څلورمه ناحیه کې د ملګرو ملتونو د پروژوي خدمتونو ادارې یا یونپس په تخنیکي همکارۍ پلې شوې ده.

د جلال‌اباد مرستیال ښاروال مولوي مومن حمید په دې اړه جوړ شوي پروګرام کې وويل، دغه پروژه له ښاري اسانتیاوو د محرومو سیمو اوسېدونکو ته د کاري بوختیاوو او اسانتیاوو رامنځته کولو په موخه د ملګرو ملتونو د پروژوي خدمتونو د دفتر په همکارۍ طرحه او د نړۍوال بانک په مالي ملاتړ ترسره شوه.

نوموړي د سیمې له اوسېدونکو وغوښتل چې د کانکریټ شوو کوڅو ساتنې ته پام وکړي څو یې له ژر ویجاړېدو مخنیوی وشي.

دی وايي، د دغو درېیو کوڅو ټول اوږدوالی ۵۵۹ متره دی، ساحو ته په کتو په مختلفو عرضونو، همداشان یو پلچک او ۷۰ متره ویاله هم په کې شامل دي چې ټولې په کانکريټي بڼه جوړې شوې دي.

هغه دا هم وويل، د یادې پروژې ټول لګښت نهه میلیونه افغانۍ دی او د درېیو میاشتو په موده کې بشپړه شوې.

بل لور ته، د سیمې اوسېدونکي هم د دې پروژې بشپړېدو ته خوښ دي.

یوه ځايي مخور محمدنسیم وويل، له دې مخکې به د ورښتونو پر مهال دوی په ډېرو ستونزو کې وو.

خو هغه زیاتوي چې اوس يې کوڅې پخې شوې او له دې وروسته به له ستونزو سره نه مخ کېږي.

د جلال‌اباد ښاروالۍ مسوولين وايي، هڅه کوي چې د نړۍوالو ادارو په همکارۍ د ښار ټولې فرعي کوڅې په کانکرېټي بڼه جوړې کړي.