کابل (پژواک، ۱۷ زمری ۱۴۰۳): د کابل ښار دوولسمې ناحيې اړوند د محبس له څلور لارې تر سليمکاروان سړک پورې د څه باندې ۱۰۷ میلیون افغانیو په لګښت د سړک جوړولو چارې پیل شوې.
کابل ښاروالۍ پر خپله اېکس پاڼه لیکلي چې د دغه سړک جوړولو چارې تېره ورځ پیل شوې.
سرچینې زیاته کړې، یاد سړک ۲۰۰۹ متره اوږدوالی او له ۲۴ تر ۴۰ مترو پورې پلنوالی لري.
د سرچینې په حواله، د سړک جوړولو په دې پروژه کې د لښتیو، پلولارو او ګلدانونو جوړولو، د څراغونو او ترافيکي نښو لګولو او د بايسکل چلولو کرښو اچولو چارې شاملې دي.
د سرچینې د معلوماتو له مخې، د دغه سړک چارې به د نږدې يو کال په موده کې د څه باندې ۱۰۷ میلیون افغانیو په لګښت بشپړې شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن