<p style="text-align: justify;">هرات (پژواک، ۱۹ وږی ۱۴۰۳): هرات کې یوه ښځه چې د یونیم میلیون افغانیو په پانګونه یې د ښځو لپاره ځانګړی رسټورانټ جوړ کړی وايي، دلته د خوړو خدماتو ترڅنګ ښځو ته د افکارو د تبادلې او مطالعې مناسب چاپېریال هم برابر شوی دی.</p>
<p style="text-align: justify;">په هېواد کې له سیاسي بدلون راهیسې در درېیو کلونو په تېرېدو او واک ته د اسلامي امارت له رسېدو سره، که څه هم چې ښځو ته د کار زمینه محدوده شوې، خو د شته شمېرو پر بنسټ، په هرات ولایت کې د هغو ښځو شمېر ډېر شوی چې کوچنیو کاروبارونو ته یې مخه کړې ده.</p>
<p style="text-align: justify;">له دغو ښخو یوه مرجان عزیزي ده چې په هرات ښار کې یې د «کافه لته» په نوم یو رسټورانټ جوړ کړی، هغې له پژواک اژانس سره خبرو کې وویل چې دغه ځای یې د انګېزې ورکولو او ښځو ته د کار زمینې برابرولو په موخه جوړ کړی دی.</p>
<p style="text-align: justify;">هغې زیاته کړه: «په اول قدم کې مې د کاروبار شروع کولو لپاره د ښار په یوه برخه کې یو کوچنی ځای جوړ کړ، وروسته مې چې کار وده وکړه او د خپلو ښځینه مشتریانو له ګرم هرکلي سره مخ شوم، نو د خپل کاروبار پراخولو تصمیم مې ونیو.»</p>
<p style="text-align: justify;">عزیزي وايي، څو میاشتې مخکې یې هرات ښار کې دغه راسټورانت جوړ کړی او هره ورځ زیات شمېر ښځې دغه ځای ته ورځي او دوی ورته د خوړو، څښاک، قهوې او کتاب مطالعې اسانتیاوې برابرې کړې دي.</p>
<p style="text-align: justify;">هغه زیاتوي چې لومړی پانګه لږ وه، خو بیا یې هم کار پیل کړ او د وخت په تېرېدو یې په دغه رسټورانټ کې نږدې یو میلیون او ۵۰۰ زره افغانۍ پانګونه وکړه او د دې ترڅنګ یې ۷ نورو ښځو ته د کار او فعالیت زمینه هم برابره کړې ده.</p>
<p style="text-align: justify;">هغې څرګنده کړه چې دا او ټیم یې د ښځو په اړه د حکومت د شته قوانینو په رعایتولو توانېدلي څو دغه رسټورانټ پرانیزي او خپل سوداګریز فعالیت وکړي.</p>
<p style="text-align: justify;">دغه سوداګره ښځه له حکومته د شته امنیت د دوام غوښتنه کوي؛ ځکه د هغې په خبره، شته امنیت د دې لامل کېږي څو د داخلي مشتریانو ترڅنګ بهرني مشتریان هم رسټورانټ ته ورشي.</p>
<p style="text-align: justify;">هرات کې د ښځو لپاره د ځانګړي رسټوانټ جوړېدل د دغه ولایت د اوسېدونکو، په ځانګړې توګه د ښځو له تاوده هرکلي سره مخ شوي دي.</p>
<p style="text-align: justify;">د دغه رسټورانټ یوه مشتري سارا سادات وايي چې دغه رسټورانټ د ښځو او نجونو لپاره یو عالي ځای دی. په دغه ځای کې خوراکي توکي، مشروبات او دغه راز د مطالعې لپاره اېښودل شوي کتابونه د ستایلو دي.</p>
<p style="text-align: justify;">سادات زیاته کړه: «دغه د ښځو لپاره ډېر راحت او عالي ځای دی؛ ځکه چې نارینه مشتري نه لري، په دغه ځای کې ټولې ښځې د ارام احساس کوي او د مطالعې، خوراک او څښاک پر مهال هم کوم مزاحمت نشته.»</p>
<p style="text-align: justify;">بلخوا، د دغه رسټورانټ بله مشتري حسیبا بارکزۍ وايي، دا چې په هرات ولایت د ښځو لپاره د دغه ډول خدماتو وړاندې کولو مرکزونو له جوړېدو خوښه ده او دغه ځای د دې لامل شوی څو په اونۍ کې له خپلو ملګرو سره ډېر کتابونه مطالعه کړي او د دغه رسټورانټ د خوړو او مشروباتو بیې هم مناسبې دي.</p>
<p style="text-align: justify;">دغه راز، د هېواد په لوېدیځ زون کې د ښځو پانګونې او سوداګرۍ خونې مسوولین د هرات ښار په کچه د دغه ډول رسټورانټونو له جوړېدو هرکلی کوي او وايي چې ښځې کولای شي دغه ارام ځای ته ورشي او له چمتو شوو خوړو د استفادې ترڅنګ مطالعه هم وکړي.</p>
<p style="text-align: justify;">د هېواد په لوېدیځ زون کې د ښځو د پانګونې او سوداګرۍ خونې رییسې بهناز سلجوقي له پژواک سره خبرو کې وویل: «له دې مخکې مو د داسې رسټورانټ برخه کې پانګونه نه درلوده چې مدیریت یې ښځې پر غاړه ولري، له نېکه مرغه د «کافه لته» له رسټوانټ وروسته به په نږدې راتلونکي کې د ښځو له لوري یو بل راسټورانټ هم پرانیستل شي.»</p>
<p style="text-align: justify;">هغې زیاته کړه، یوه له اسانتیاوو دا ده چې په دغسې ځایونو کې خدمات هم د ښځینهوو له خوا وړاندې کېږي.</p>
