پزشکیان د اسلامي هېوادونو ترمنځ د یو بل پر ‌منلو ټینګار وکړ

کابل (پژواک، ۱۲ تله ۱۴۰۳): د ایران ولسمشر مسعود پزشکیان د سعودي عربستان د بهرنیو چارو له وزیر فیصل بن فرحان سره په لیدنه کې ویلي چې ایران د نظر اختلافاتو لرې کولو غوښتونکی دی او د اسلامي هېوادونو ترمنځ د یو بل پر منلو باور لري.

پزشکیان چې د اسیایي هېوادونو د همکارۍ غونډه کې د ګډون په موخه دوحې ته سفر کړی، د سعودي د بهرنیو چارو له وزیر سره په لیدنه کې یې ویلي چې دوی له عربستان سره په بېلابېلو برخو کې د تعاملاتو پراختیا ته لېوالتیا لري.

ایسنا خبري اژانس د هغه له قوله راپور ورکړی: «موږ اسلامي هېوادونه خپل ورونه ګڼو، د نظر اختلاف پر لرې کېدو او د یو بل پر منلو ټینګار کوو.»

د ایران او سعودي ډيپلوماتيکې اړیکې په ۱۳۹۴ کال کې په تهران کې د دغه هېواد پر سفارت او په مشهد کې د دغه هېواد پر قونسل‌ګرۍ له بریدونو وروسته له منځه لاړې.

ایران او سعودي له اوو کلونو اړیکو نه لرلو وروسته، د ۱۴۰۱ کال د کب په ۱۹مه په چین کې بیا د ډیپلوماتيکو اړیکو پر پیل توافق وکړ.