افغان پلاوی د اقلیمي بدلون نړۍوال کنفرانس د ګډون په موخه باکو ته ولاړ

کابل (پژواک، ۲۰ لړم ۱۴۰۳): د چاپېریال ساتنې ملي ادارې مشر مولوي مطیع‌الحق خالص، د یوه تخنیکي پلاوي په مشرۍ د ملګرو ملتونو د اقلیمي بدلون نړۍوال کنفرانس (COP-29) کې د ګډون په موخه اذربایجان ته ولاړ.

د ملګرو ملتونو د اقلیمي بدلون نړۍوال کنفرانس (COP-29) به د روان زېږدیز کال د نوامبر له ۱۱مې تر ۲۲مې نېټې د اذربایجان پلازمېنه باکو کې ترسره شي. د نړۍ د ډېر شمېر هېوادونو مشران، د چاپېریال ساتنې وزیران او متخصصین به په دغه کنفرانس کې ګډون وکړي.

د چاپېریال ساتنې ملي ادارې په خبرپاڼه کې راغلي، د اسلامي امارت تر راتګ وروسته لومړی ځل دی چې افغان پلاوي ته د اقلیمي بدلون نړۍوال کنفرانس کې د ګډون بلنه ورکول کېږي.

سرچینه زیاتوي: «افغان پلاوی به په دغه کنفرانس کې د چاپېریال ساتنې او اقلیمي بدلون برخه کې له نړۍوالو سره د همکارۍ د پیاوړتیا؛ د اقلیمي بدلون په برخه کې موجوده مالي میکانیزمونو ته د افغانستان د لاسرسي او اقلیمي بدلون سره د سازښت او مبارزې په تړاو له نړۍوالو سره خپلي غوښتني شریکې کړي.»

د خبرپاڼې له مخې، د چاپېریال ساتنې ملي ادارې عمومي رئیس مولوي مطیع‌الحق خالص، د اقلیمي بدلون نړۍوال کنفرانس کې د افغان پلاوي ګډون د افغانستان لپاره یو ښه فرصت بللی او ویلي یې دي چې په پوره چمتووالي به هڅه وکړي چې اعظمي ګټه ترې پورته کړي او له بېلابېلو لورو سره بحث او خبري وکړي.

له دې مخکې، د لړم په ۱۴مه په افغانستان کې د یوناما مشرې روزا اوتونبایوا د چاپېریال ساتنې ملي ادارې له مشر سره په لیدنه کې ویلي وو چې د اقلیمي بدلون له ناوړه اغېزو څخه ولسونه زیانمن کېږي او دې موضوع ته باید له سیاسي اړخه نه، بلکې له بشري اړخه وکتل شي.

د یوناما مرستیال اندریکا رتواتي هم له اقلیمي بدلون سره د مبارزې په برخه کې د همکارۍ ژمنه کړې او ویلي یې وو چې په تخنیکې او نورو برخو کې به د افغانستان د چاپېریال ساتنې له ادارې سره خپلې ناستې او همکاري جاري وساتي او هڅه به وکړي چې په نړۍوالوغونډو کې د افغانستان استازو لپاره د ګډون زمینه برابره شي.