له پېښو سره د مبارزې او چمتووالي اداره: په هېواد کې امنیت تامین دی، ځمکې باید له ماینونو پاکې شي

کابل (پژواک، ۳۰ لړم ۱۴۰۳): د پېښو پر وړاندې د مبارزې او چمتووالي ملي ادارې سرپرست د ماین‌پاکۍ د داخلي او بهرنیو موسسو له مسوولینو سره په لیدنه کې ویلي چې اوسمهال په هېواد کې امنیت تامین شوی او باید ټولې ځمکې له ماینونو پاکې شي.

له پېښو سره مبارزې او چمتووالي ادارې په یوه اعلامیه کې ویلي چې د دې ادارې رییس ملا نورالدین ترابي تېره ورځ په کابل کې د ماین‌پاکۍ د داخلي او خارجي موسسو له مسوولینو سره لیدلي دي.

له پېښو سره د مبارزې او چمتووالي ادارې سرپرست ویلي چې د هېواد په ډېرو برخو کې ماینونه خښ کړای شوي، اوس د اسلامي امارت په بیا واکمنېدو سره امنیت ټینګ شوی او باید ټول ماینونه لرې کړای شي څو څاروي او انسانان خوندي واوسي.

هغه دغه راز زیاته کړې: «اوس تر بل هر وخت د ماین‌پاکۍ موسسو ته ښه فرصت برابر شوی څو خپل کار چټک کړي او سیمې له ناچاودو توکو پاکې کړي او خلک د هغو له خطرونو وژغوري.»

خبرپاڼه کې راغلي چې په دې ناسته کې د ماین‌پاکۍ موسسو مسوولینو په هېواد کې د امنیت له تامینېدو خوښي وښوده او ویلي یې دي چې ډېره سیمې یې له ماینونو پاکې کړې او په دې برخه کې به لا ډېره هڅه وکړي.

سرچینې ویلي، د ماین‌پاکۍ موسسو مسوولینو او استازو هم خپلې غوښتنې او ستونزې مطرح کړې او د دې ادارې سرپرست ژمنه وکړه چې ستونزو او غوښتنو ته به یې رسېدنه وشي.