د پکتیکا پر برمل د پاکستان برید؛ متقي: پاکستان دې د انګرېز، شوروي او امریکا له ماتو درس واخلي

کابل (پژواک، ۶ مرغومی ۱۴۰۳): د بهرنیو چارو وزارت سرپرست نن په کابل کې د مرغومي شپږمې په مناسبت جوړې شوې غونډه کې وویل، که د پاکستان حکومت د افغانستان خاورې او خلکو ته په سپک نظر ګوري، نو له انګرېز، شوروي او امریکا دې درس واخلي.

پاکستان وړمه شپه د پکتیکا د برمل ولسوالۍ پر ځینو سیمو هوايي بریدونه وکړل چې د اسلامي ‌امارت د ویاند د معلوماتو له ‌مخې، په دغو بریدونو کې د ښځو او ماشومانو په ګډون ۴۶ ملکي وګړو ژوند له لاسه ورکړ او شپږ نور ټپیان شول.

د بهرنیو چارو وزارت سرپرست مولوي امیرخان متقي نن په کابل کې پر افغانستان د پخواني شوروي اتحاد د یرغل ۴۵مې کالیزې (د مرغومي شپږمه) په مناسبت غونډه کې پاکستان ته په خطاب کې د دغه برید په تړاو وویل: «ولس یې ښه ولس دی، سیاسیون ښه دي، خو یوه مشوره ورکوم، که افغانستان ته په سپک نظر ګورې، نو د شوروي  اتحاد له واکمنو سره مشوره وکړه، یو ځل د انګرېزانو تاریخ هم وګوره، د امریکا او د ناټو انجام هم وګوره چې اوس هم په سترګو لیدل کېږي؛ ځکه اوس ټول غرب، اروپا او امریکا د یوه اوکراین دفاع نه شي کولای.»

دا په داسې حال کې ده چې دغه برید د افغانستان بېلابېلو سیاستوالو په کلکه غندلی او دا یې د ټولو نړۍوالو قوانینو خلاف عمل او د پاکستان ښکاره تجاوز بللی دی.